माळी समाजावरील आक्षेपार्ह टिप्पणीमुळे फलटणमध्ये खळबळ
थेट WhatsApp वर मिळवा
दैनिक स्थैर्य । 26 मार्च 2025। फलटण । फलटण तालुक्यात एका व्यक्तीच्या वादग्रस्त विधानामुळे ओबीसी समाजाच्या भावना दुखावल्या गेल्या आहेत. दत्तात्रय नामदेव बर्गे यांनी माळी समाजाबद्दल केलेल्या आक्षेपार्ह टिप्पणीमुळे समाजात तीव्र संताप व्यक्त होत आहे.
फलटण तालुका ओबीसी संघर्ष समितीने या प्रकरणी पोलीस उपअधीक्षक राहुल धस आणि शहर पोलीस निरीक्षक हेमंतकुमार शहा यांच्याकडे निवेदन दाखल केली आहे. समितीच्या निवेदनानुसार, दत्तात्रय बर्गे यांनी प्रीतम शिंदे व राहुल राजेंद्र राऊत यांच्याशी फोनवरून बोलताना माळी समाजाबद्दल अत्यंत आक्षेपार्ह भाषा वापरली आहे.
ओबीसी संघर्ष समितीचे प्रतिनिधी म्हणाले, “बर्गे यांच्या या वक्तव्यामुळे केवळ माळी समाजच नव्हे तर संपूर्ण ओबीसी समाज दुखावला गेला आहे. अशा प्रकारच्या विधानांमुळे समाजात तेढ निर्माण होण्याची शक्यता आहे.”
समितीने या प्रकरणी कडक कारवाईची मागणी केली असून फलटण शहर पोलीस स्टेशनमध्ये गुन्हा दाखल करण्याची विनंती केली आहे. “समाजातील सलोखा टिकवून ठेवण्यासाठी अशा प्रकारच्या कृत्यांवर वेळीच आळा घालणे आवश्यक आहे,” असे मत समितीने व्यक्त केले.
