उच्च शिक्षण घेणाऱ्या विद्यार्थ्यांना मोठा दिलासा; शुल्कवाढीला स्थगिती मिळणार
थेट WhatsApp वर मिळवा
राज्यात निर्माण झालेल्या दुष्काळी परिस्थितीमुळे व्यावसायिक अभ्यासक्रमांच्या शुल्कवाढीला एक वर्ष स्थगिती देण्याची मागणी जोर धरत असून, विद्यार्थ्यांच्या आर्थिक अडचणींवर उच्च व तंत्रशिक्षण मंत्री चंद्रकांत पाटील यांनी महत्त्वपूर्ण संकेत दिले आहेत.
स्थैर्य, सातारा, दि. २५ ऑक्टोबर : राज्यातील दुष्काळी परिस्थितीमुळे शेतकरी आणि पालकांची आर्थिक स्थिती ढासळली आहे. अशा कठीण काळात इंजिनिअरिंग, मेडिकल, फार्मसी, मॅनेजमेंट आणि हॉटेल मॅनेजमेंट यांसारख्या व्यावसायिक अभ्यासक्रमांच्या शुल्कवाढीला एक वर्ष स्थगिती द्यावी, अशी मागणी समोर येत आहे. मागील वर्षी लागू असलेले शुल्कच आगामी शैक्षणिक वर्षात कायम ठेवावे, जेणेकरून विद्यार्थ्यांवर अतिरिक्त आर्थिक भार पडणार नाही, असा सूर उमटत आहे.
विद्यार्थ्यांच्या अडचणी आणि प्रशासकीय प्रक्रिया
विविध व्यावसायिक अभ्यासक्रमांमधील शुल्क निश्चितीची जबाबदारी शुल्क नियामक प्राधिकारणाकडे (FRA) असते. महाविद्यालयांकडून खर्चाचे आणि शुल्कवाढीचे प्रस्ताव मागवून त्याचे निर्धारण केले जाते. मात्र, सद्यस्थितीतील दुष्काळ आणि पालकांच्या उत्पन्नात झालेली घट पाहता, शुल्कावाढीचा निर्णय घेताना सामाजिक व आर्थिक परिस्थितीचा विचार करणे गरजेचे असल्याचे तज्ज्ञांचे मत आहे. शैक्षणिक वर्ष २०२७-२८ साठी शुल्कनिश्चितीचे प्रस्ताव सादर करण्याची अंतिम मुदत ३१ ऑक्टोबर आहे.
मंत्र्यांची भूमिका आणि सवलती
या संपूर्ण प्रकरणावर बोलताना उच्च व तंत्रशिक्षण मंत्री चंद्रकांत पाटील यांनी, विशेष बाब म्हणून पुढील वर्षीच्या शुल्कवाढीला स्थगिती देण्याबाबत विचार करता येईल, असे वक्तव्य केले आहे. आधीच मुलींसाठी शिक्षण आणि परीक्षा शुल्कात पूर्ण सवलत असून मागासवर्गीय प्रवर्गातील विद्यार्थ्यांनाही सवलती मिळत आहेत. मात्र, उर्वरित विद्यार्थ्यांना वाढीव शुल्कातून दिलासा मिळण्यासाठी शासन काय निर्णय घेणार, याकडे पालकांचे लक्ष लागले आहे.
