नीरा खोऱ्यातील धरणे ९९ टक्के भरली; वीर व भाटघरमधून पाण्याचा मोठा विसर्ग
नीरा प्रणालीतील धरणांमध्ये ९९ टक्के उपयुक्त पाणीसाठा जमा झाला असून भाटघर व वीर धरण शंभर टक्के भरले आहे. धरणांमधून पाण्याचा मोठा विसर्ग सुरू आहे.
स्थैर्य, फलटण, दि. ११ ऑगस्ट : नीरा प्रणालीतील धरणांमध्ये तब्बल ९९.०३ टक्के उपयुक्त पाणीसाठा जमा झाला आहे. भाटघर आणि वीर ही दोन प्रमुख धरणे १०० टक्के भरली असून या धरणांमधून नदीपात्रात आणि कालव्यांद्वारे पाण्याचा विसर्ग सुरू करण्यात आला आहे. मागील वर्षीच्या तुलनेत यंदा पाणीसाठ्यात लक्षणीय वाढ झाल्याने शेतीसह पिण्याच्या पाण्याचा प्रश्न मिटला आहे.
धरणांमधील पाणीसाठ्याची सद्यस्थिती
जलसंपदा विभागाच्या ताज्या आकडेवारीनुसार, नीरा खोऱ्यात एकूण ४७.८६ टीएमसी पाणीसाठा जमा झाला आहे. भाटघर धरणात २३.५० टीएमसी आणि वीर धरणात ९.४० टीएमसी उपयुक्त पाणीसाठा झाला असून ही दोन्ही धरणे शंभर टक्के भरली आहेत. नीरा देवघर धरणात ११.६२ टीएमसी म्हणजेच ९९.१४ टक्के, तर गुंजवणी धरणात ३.३२ टीएमसी म्हणजेच ९०.०३ टक्के साठा उपलब्ध आहे. मागील वर्षी याच दिवशी धरणांमध्ये ४५.०२ टीएमसी (९३.१६ टक्के) पाणीसाठा होता.
पाण्याचा विसर्ग सुरू
धरण क्षेत्रात पाण्याची आवक सुरू असल्याने सुरक्षिततेच्या कारणास्तव विसर्ग सुरू ठेवण्यात आला आहे. वीर धरणातून १ हजार १०० क्युसेक्स वेगाने पाणी सोडले जात आहे. तसेच नीरा डाव्या कालव्यातून ७५० तर उजव्या कालव्यातून १ हजार ५५० क्युसेक्स विसर्ग सुरू आहे. भाटघर धरणाच्या वीजगृहातून १ हजार २३६ क्युसेक्स, नीरा देवघरमधून ७५० आणि गुंजवणी धरणातून २५० क्युसेक्सने पाणी सोडले जात आहे.
