
थेट WhatsApp वर मिळवा
बालविवाहाचे दुष्परिणाम रोखण्यासाठी मुंबईत ‘बालहक्क सप्ताहा’निमित्त सामूहिक प्रतिज्ञा घेण्यात आली असून, नागरिकांनी ऑनलाइन शपथ व १०९८ हेल्पलाईनचा वापर करण्याचे आवाहन करण्यात आले आहे.
स्थैर्य,सातारा, दि. २० नोव्हेंबर : बालविवाहामुळे मुलांचे शिक्षण, आरोग्य आणि व्यक्तिमत्त्व विकासावर होणारे गंभीर दुष्परिणाम रोखण्यासाठी शासकीय यंत्रणेसोबतच स्वयंसेवी संस्था आणि समाजानेही सक्रिय पुढाकार घेणे आवश्यक आहे, असे मत जिल्हा महिला व बाल विकास अधिकारी शोभा शेलार यांनी व्यक्त केले. केंद्र शासनाच्या ‘बालविवाह मुक्त भारत’ मोहिमेंतर्गत राज्यात १८ ते २७ नोव्हेंबर दरम्यान ‘बालहक्क सप्ताह’ राबवण्यात येत आहे. या निमित्ताने मुंबई सेंट्रल येथील वायएमसीए येथे गुरुवारी (दि. १९) बालविवाह प्रतिबंधक सामूहिक शपथ कार्यक्रमाचे आयोजन करण्यात आले होते.
कायद्याच्या प्रभावी अंमलबजावणीवर भर
जिल्हा महिला व बाल विकास अधिकारी कार्यालय, जिल्हा बाल संरक्षण कक्ष आणि चाइल्ड हेल्पलाईन १०९८ यांच्या संयुक्त विद्यमाने हा उपक्रम पार पडला. यावेळी शोभा शेलार यांनी ‘बालविवाह प्रतिबंधक अधिनियम, २००६’ च्या प्रभावी अंमलबजावणीचे महत्त्व अधोरेखित केले. कार्यक्रमात उपस्थित शासकीय अधिकारी, बालगृहांचे प्रतिनिधी आणि स्वयंसेवी संस्थांच्या सदस्यांनी मुंबई शहर जिल्हा बालविवाहमुक्त करण्याची सामूहिक प्रतिज्ञा घेतली.
ऑनलाइन प्रतिज्ञा आणि १०९८ हेल्पलाईनचे आवाहन
या जनजागृती मोहिमेत सर्वसामान्य नागरिकांनीही सहभागी व्हावे, यासाठी शासनाच्या अधिकृत संकेतस्थळावर (stopchildmarriage.wcd.gov.in) जाऊन ऑनलाइन प्रतिज्ञा घेण्याचे आवाहन आयोजकांनी केले आहे. तसेच परिसरात कोठेही बालविवाहाचा प्रकार निदर्शनास आल्यास नागरिकांनी तात्काळ चोवीस तास सुरू असणाऱ्या ‘१०९८’ या मोफत चाइल्ड हेल्पलाईन क्रमांकावर संपर्क साधून बालकांचे भविष्य सुरक्षित करावे, असे सांगण्यात आले आहे.





