मध्यवर्ती युवा महोत्सवात मुधोजी महाविद्यालयाचे घवघवीत यश; विविध कलाप्रकारांत पटकावली पारितोषिके
थेट WhatsApp वर मिळवा
शिवाजी विद्यापीठाच्या ४६ व्या मध्यवर्ती युवा महोत्सवात मुधोजी महाविद्यालयाने लोकवाद्यवादनात प्रथम क्रमांकासह विविध कलाप्रकारांत चमकदार कामगिरी केली.
स्थैर्य, फलटण, दि. ११ ऑक्टोबर : शिवाजी विद्यापीठ कोल्हापूर आणि मुधोजी महाविद्यालय फलटण यांच्या संयुक्त विद्यमाने आयोजित ४६ व्या मध्यवर्ती युवा महोत्सवात मुधोजी महाविद्यालयाच्या विद्यार्थ्यांनी विविध कलाप्रकारांत यश संपादन करत महाविद्यालयाच्या सांस्कृतिक परंपरेत मानाचा तुरा रोवला.
विविध स्पर्धांमध्ये पटकावली पारितोषिके
महोत्सवात महाविद्यालयाने लोकवाद्यवादन स्पर्धेत प्रथम क्रमांक तर एकल लोकवाद्यवादनात द्वितीय क्रमांक पटकावला. याशिवाय लघुपट स्पर्धेत तृतीय क्रमांक, तसेच लोककला, मूकनाट्य, नकला आणि पाश्चिमात्य एकल वाद्यवादन या प्रकारांत चतुर्थ क्रमांक मिळवला. तसेच स्थळचित्रणात तृतीय क्रमांक, भित्तीचित्र निर्मिती पोस्टर स्पर्धेत आणि इंग्रजी वक्तृत्व स्पर्धेत पंचम क्रमांक मिळवत विद्यार्थ्यांनी छाप पाडली.
मान्यवरांकडून कौतुक व अभिनंदन
विद्यार्थ्यांच्या या यशाबद्दल फलटण एज्युकेशन सोसायटीचे अध्यक्ष रामराजे नाईक निंबाळकर, चेअरमन रघुनाथराजे नाईक निंबाळकर, सेक्रेटरी संजीवराजे नाईक निंबाळकर, प्रशासन अधिकारी प्राचार्य अरविंद निकम, प्राचार्य डॉ. पी. एच. कदम, डॉ. टी. पी. शिंदे आणि सांस्कृतिक विभागप्रमुख प्रा. एल. सी. वेळेकर यांनी सर्व यशस्वी विद्यार्थ्यांचे व मार्गदर्शकांचे अभिनंदन केले.
