श्रीमंत संजीवराजे नाईक निंबाळकर यांच्या वाढदिवसानिमित्त फलटणच्या उद्यानविद्या व कृषी महाविद्यालयात रक्तदान शिबिर; ८० रक्तपिशव्यांचे संकलन
थेट WhatsApp वर मिळवा
फलटण येथील श्रीमंत शिवाजीराजे उद्यानविद्या महाविद्यालय व कृषी महाविद्यालयात आयोजित रक्तदान शिबिराला विद्यार्थी व कर्मचाऱ्यांनी उत्स्फूर्त प्रतिसाद दिला असून, ८० रक्तपिशव्यांचे संकलन करण्यात आले आहे.
स्थैर्य, फलटण, दि. ०९ ऑक्टोबर : फलटण एज्युकेशन सोसायटीचे सेक्रेटरी तथा सातारा जिल्हा परिषदेचे माजी अध्यक्ष श्रीमंत संजीवराजे नाईक निंबाळकर यांच्या ६२ व्या वाढदिवसानिमित्त महात्मा फुले कृषी विद्यापीठ, राहुरी मान्यता प्राप्त व फलटण एज्युकेशन सोसायटी संचलित श्रीमंत शिवाजीराजे उद्यानविद्या महाविद्यालय व कृषी महाविद्यालय, फलटण येथे भव्य रक्तदान शिबिराचे आयोजन करण्यात आले. राष्ट्रीय सेवा योजना (NSS) विभाग व फलटण ब्लड बँकेच्या संयुक्त विद्यमाने शुक्रवारी पार पडलेल्या या शिबिराला विद्यार्थी, शिक्षक व शिक्षकेतर कर्मचाऱ्यांनी उत्स्फूर्त प्रतिसाद दिला.
मानवसेवा आणि सामाजिक बांधिलकीचा संदेश
सकाळी ९.३० ते सायंकाळी ६ वाजेपर्यंत चाललेल्या या शिबिरामध्ये एकूण ८० रक्तपिशव्यांचे संकलन करण्यात आले. वाढदिवसाचे औचित्य साधून सामाजिक जाणिवा जोपासत राबविण्यात आलेल्या या उपक्रमातून मानवसेवेचा आणि समाजाप्रती असलेल्या कर्तव्यभावनेचा संदेश देण्यात आला. आपत्कालीन परिस्थितीत गरजू रुग्णांना वेळेवर रक्त उपलब्ध व्हावे आणि समाजात रक्तदानाविषयी जागरूकता निर्माण व्हावी, हा यामागील प्रमुख उद्देश होता.
मान्यवरांची उपस्थिती आणि मार्गदर्शन
या शिबिराला फलटण नगरपरिषदेचे नगरसेवक श्रीमंत अनिकेतराजे नाईक निंबाळकर प्रमुख पाहुणे म्हणून उपस्थित होते. तसेच गव्हर्निंग कौन्सिल व महाविद्यालयीन समितीचे सदस्य, उद्यानविद्या महाविद्यालयाचे प्राचार्य डॉ. एस. डी. निंबाळकर, कृषी महाविद्यालयाचे प्राचार्य डॉ. यू. डी. चव्हाण, राष्ट्रीय सेवा योजना कार्यक्रम अधिकारी प्रा. एस. पी. तरटे आणि प्रा. एम. एस. बिचुकले उपस्थित होते. या उपक्रमामुळे विद्यार्थ्यांमध्ये सामाजिक उत्तरदायित्व आणि सहकार्याची भावना रुजण्यास मदत झाली असून, दोन्ही महाविद्यालयांच्या वतीने समाजसेवेचा आदर्श निर्माण करण्यात आला आहे.
