एसटीच्या ‘एनसीएमसी’ कार्डचे ऑनलाईन रिचार्ज आता अधिक सोपे; जाणून घ्या संपूर्ण प्रक्रिया

एसटी महामंडळाच्या एनसीएमसी स्मार्ट कार्ड रिचार्जसाठी ऑनलाईन पोर्टल सुविधा उपलब्ध झाली असून प्रवाशांना घरबसल्या रिचार्ज करता येणार आहे.

स्थैर्य, सातारा, दि. ११ सप्टेंबर : एसटी महामंडळाने सवलतीच्या प्रवासासाठी अनिवार्य केलेल्या ‘नॅशनल कॉमन मोबिलिटी कार्ड’ (NCMC) वापरणाऱ्या प्रवाशांसाठी महत्त्वाची बातमी समोर आली आहे. एसटी स्थानकांवर किंवा वाहकांकडे लागणाऱ्या लांबच लांब रांगा टाळण्यासाठी महामंडळाने ऑनलाईन रिचार्ज प्रक्रिया अधिक सुलभ केली आहे. आता प्रवासी आपल्या मोबाईलवरून यूपीआय (UPI), डेबिट अथवा क्रेडिट कार्डचा वापर करून अवघ्या काही मिनिटांत हे कार्ड रिचार्ज करू शकणार आहेत.

ऑनलाईन रिचार्ज करण्याची टप्प्याटप्प्याने प्रक्रिया

एनसीएमसी कार्ड ऑनलाईन रिचार्ज करण्यासाठी प्रवाशांना अधिकृत पोर्टलला (mtpcardonline.com) भेट द्यावी लागेल. त्यानंतर कार्डचा १६ अंकी क्रमांक प्रविष्ट करून इच्छित रिचार्ज रक्कम निवडावी लागेल. पेमेंटसाठी यूपीआय किंवा डिजिटल वॉलेटचा पर्याय निवडून व्यवहार पूर्ण केल्यानंतर पोर्टलवर रिचार्ज यशस्वी झाल्याचा संदेश प्राप्त होईल. या सुलभ डिजिटल प्रक्रियेमुळे प्रवाशांचा बसस्थानकांवरील वेळ वाचणार असून कार्ड रिचार्ज करणे अधिक सोयीचे झाले आहे.

बसमध्ये व्हॅलिडेट करणे अनिवार्य

ऑनलाईन पेमेंट यशस्वी झाल्यानंतर प्रवाशांना एसटी बसमधील किंवा स्थानकावरील मशीनवर ते कार्ड व्हॅलिडेट (प्रमाणित) करणे आवश्यक आहे. वाहकाकडील डिजिटल मशीनवर कार्ड स्पर्श करताच ऑनलाईन रिचार्ज केलेली रक्कम कार्डच्या मुख्य शिल्लक रक्कमेमध्ये समाविष्ट होईल. त्यामुळे प्रवाशांनी ऑनलाईन रिचार्ज केल्यानंतर पहिल्या प्रवासादरम्यान वाहकाकडून ते व्हॅलिडेट करून घ्यावे, असे आवाहन एसटी महामंडळाकडून करण्यात आले आहे.