राज्यात १ जूनपासून हवामानात बदल; वादळी पावसाचा अंदाज, मात्र मान्सून १० जूनपर्यंत नाही
राज्यात १ जूनपासून हवामानात बदल होणार असून विदर्भ, मराठवाडा आणि मध्य महाराष्ट्रात वादळी पावसाचा अंदाज आहे. मात्र, हा मान्सूनचा पाऊस नसून शेतकऱ्यांनी पेरणीची घाई करू नये, असे आवाहन प्रशासनाने केले आहे.
स्थैर्य, फलटण, दि. ३१ मे : सध्या राज्यातील हवामानात बदल होण्यास सुरुवात झाली असून, १ जूनपासून सुरू होणाऱ्या आठवड्यात यात आणखी बदल पाहायला मिळणार आहे. राज्याच्या विविध भागांत दुपारनंतर ढगाळ वातावरण आणि वादळी पावसाचा अंदाज वर्तवण्यात आला आहे. मात्र, आगामी वादळी पावसाचा मान्सूनशी काहीही संबंध नसल्याचेही प्रशासनाने स्पष्ट केले आहे.
तापमानात घट, पण पूर्व विदर्भात उष्णता कायम
हवामान विभागाच्या अंदाजानुसार, प्रामुख्याने विदर्भ, मराठवाडा, मध्य महाराष्ट्र आणि खानदेशात दुपारनंतर ढग जमा होऊन काही प्रमाणात वादळी पाऊस पडण्याची शक्यता आहे. कोकणात देखील काही ठिकाणी पावसाचा अंदाज आहे. मे महिन्याच्या तुलनेत राज्यातील कमाल तापमानात आता घट होईल, ज्यामुळे उकाड्यापासून काहीसा दिलासा मिळेल. मात्र विदर्भातील काही भागांमध्ये, विशेषतः पूर्व विदर्भात कमाल तापमान अद्यापही ४० अंश सेल्सिअसच्या वर कायम राहण्याची शक्यता आहे.
१० जूनपर्यंत मान्सूनची शक्यता नाही
राज्यात पडणारा आगामी पाऊस हा पूर्वमोसमी (वादळी) स्वरूपाचा आहे. मान्सून अद्याप केरळातही पोहोचलेला नाही. सध्याच्या हवामानाच्या स्थितीनुसार राज्यातील बहुतांश भागांमध्ये किमान १० जूनपर्यंत मान्सूनचे आगमन होण्याची कोणतीही शक्यता नाही, असा अंदाज वर्तवण्यात आला आहे.
शेतकरी व नागरिकांना प्रशासनाचे आवाहन
कृषी आणि आपत्ती व्यवस्थापन विभागाकडून संभाव्य हवामान बदलाच्या पार्श्वभूमीवर सतर्कतेचा इशारा देत नागरिकांना आणि शेतकऱ्यांना महत्त्वाचे आवाहन करण्यात आले आहे:
-
पेरणीची घाई नको: शेतकऱ्यांनी या वादळी आणि पूर्वमोसमी पावसावर अवलंबून राहून तसेच मान्सूनचे अधिकृत आगमन होण्यापूर्वी पेरणीची घाई अजिबात करू नये.
-
विजांपासून संरक्षण: विजेच्या कडकडाटाच्या वेळी नागरिकांनी आणि शेतकऱ्यांनी स्वतःची तसेच आपल्या पाळीव जनावरांची सुरक्षितता सुनिश्चित करावी. वादळी वाऱ्याच्या आणि विजा चमकण्याच्या वेळी झाडाखाली, पत्र्याच्या शेडखाली (टिनशेड), तसेच विद्युत ट्रान्सफॉर्मर, विजेचे खांब आणि विद्युत वाहिन्यांच्या जवळ उभे राहणे टाळावे.
