सातारा जिल्ह्याचा सर्वांगीण विकास हेच ध्येय! महाराष्ट्र दिनानिमित्त पालकमंत्री शंभूराज देसाई यांची ग्वाही

 महाराष्ट्र राज्याच्या ६७ व्या स्थापना दिनानिमित्त साताऱ्यात पालकमंत्री शंभूराज देसाई यांच्या हस्ते मुख्य शासकीय ध्वजवंदन संपन्न झाले. यावेळी त्यांनी सातारा जिल्ह्याला राज्याच्या नकाशावर पहिल्या क्रमांकावर नेण्याची ग्वाही दिली.

स्थैर्य, सातारा, दि. १ : स्वर्गीय यशवंतरावजी चव्हाण आणि स्वर्गीय बाळासाहेब देसाई यांच्यासारख्या थोर सुपुत्रांनी महाराष्ट्र राज्याच्या प्रगतीचा पाया रचला. त्यांच्या विचारांचा वारसा पुढे चालवत सातारा जिल्ह्याला राज्याच्या नकाशावर पहिल्या क्रमांकावर नेण्यासाठी आम्ही कटिबद्ध आहोत, अशी महत्त्वपूर्ण ग्वाही सातारा जिल्ह्याचे पालकमंत्री शंभूराज देसाई यांनी दिली.

श्रीमंत छत्रपती शाहू जिल्हा क्रीडा संकुल येथे महाराष्ट्र राज्याच्या ६७ व्या स्थापना दिनानिमित्त राष्ट्रध्वजवंदन पालकमंत्री शंभूराज देसाई यांच्या हस्ते संपन्न झाले, यावेळी ते बोलत होते.

मान्यवरांची उपस्थिती

या प्रसंगी जिल्हाधिकारी संतोष पाटील, मुख्य कार्यकारी अधिकारी याशनी नागराजन, पोलीस अधीक्षक निखील पिंगळे, सार्वजनिक बांधकाम विभागाचे अधीक्षक अभियंता संतोष रोकड, अपर पोलीस अधीक्षक वैशाली कडूकर, निवासी उपजिल्हाधिकारी नागेश पाटील, उपजिल्हाधिकारी विक्रांत चव्हाण यांच्यासह विविध विभागांचे अधिकारी व नागरिक मोठ्या संख्येने उपस्थित होते.

पालकमंत्र्यांच्या भाषणातील महत्त्वाचे मुद्दे :

• थोर नेत्यांना अभिवादन: १९६० साली महाराष्ट्राचा ‘मंगल कलश’ आणणाऱ्या यशवंतरावजी चव्हाण आणि राज्याच्या जडणघडणीत योगदान देणाऱ्या सर्व थोर व्यक्तींचे त्यांनी कृतज्ञतापूर्वक स्मरण केले.

  

• राज्यातील गुंतवणूक व सिंचन: राज्याने परकीय गुंतवणुकीचे मोठे उद्दिष्ट ठेवले असून, दावोस येथील जागतिक गुंतवणूक परिषदेत महाराष्ट्राने सर्वाधिक सामंजस्य करार करून देशात आपले अग्रस्थान टिकवून ठेवले आहे. इंच न् इंच जमीन ओलिताखाली आणणे आणि अपूर्ण जलप्रकल्प पूर्ण करण्याला शासनाचे प्राधान्य आहे. तसेच प्रकल्पग्रस्तांना न्याय देण्याची शासनाची सकारात्मक भूमिका आहे.

• साताऱ्याच्या योजनांचे पंतप्रधानांसमोर सादरीकरण: सातारा जिल्ह्याने राबविलेल्या ‘मॉडेल स्कूल’ आणि ‘स्मार्ट प्राथमिक आरोग्य केंद्र’ या योजनांचे सादरीकरण थेट पंतप्रधान नरेंद्र मोदी यांच्यासमोर झाले, ही जिल्ह्यासाठी मोठी अभिमानाची बाब असल्याचे ते म्हणाले.

• विकासासाठी आवाहन: जिल्हा नियोजन समिती आणि सीएसआर (CSR) निधीच्या माध्यमातून ग्रामीण भागातील शाळांचा दर्जा सुधारण्यावर भर दिला जात आहे. जिल्ह्याच्या विकासासाठी लोकप्रतिनिधी आणि प्रशासन हातात हात घालून काम करत असून, या विकासयात्रेत जिल्हावासीयांनी खंबीर साथ द्यावी, असे आवाहन त्यांनी केले.

पालकमंत्र्यांच्या हस्ते विविध पुरस्कारांचे वितरण

या मुख्य शासकीय कार्यक्रमादरम्यान विविध क्षेत्रांत उल्लेखनीय कार्य करणाऱ्या व्यक्तींचा आणि अधिकाऱ्यांचा पालकमंत्र्यांच्या हस्ते विशेष सन्मान करण्यात आला:

• मुख्यमंत्री रोजगार निर्मिती कार्यक्रम पुरस्कार: जिल्हाधिकारी संतोष पाटील, जिल्हा अग्रणी बँकेचे नितीन तळपे, जिल्हा उद्योग केंद्राचे महाव्यवस्थापक उमेशचंद दंडगव्हाळ.

• पुण्यश्लोक अहिल्यादेवी होळकर वैयक्तिक जिल्हास्तरीय पुरस्कार: वैशाली कृष्णात चोरमले आणि सुचित्रा घोगरे-काटकर.

• जिल्हा क्रीडा पुरस्कार (२०२६):

  • आर्या देवेंद्र बारटक्के (गुणवंत खेळाडू महिला – बॉक्सिंग)

  • कुशल कुमार मोहिते (गुणवंत खेळाडू पुरुष – मैदानी)

  • वेदांत संदीप साळुंखे (गुणवंत खेळाडू दिव्यांग – मैदानी)

  • विनोद विलास कदम (गुणवंत मार्गदर्शक – स्केटिंग)

• आदर्श ग्राम महसूल अधिकारी पुरस्कार: रावू सतीश मुंगळे (तहसील कार्यालय, कोरेगाव).

• उत्कृष्ट कर्मचारी सत्कार: नलिनी मंगेश कांबळे (अहिवळे) (वर्ग-४ शिपाई कर्मचारी, जिल्हाधिकारी कार्यालय, सातारा).

• पोलीस प्रशासन पुरस्कार: विलास नभू माने (पोलीस पाटील, मस्करवाडी, ता. जि. सातारा).

( ध्वजारोहणाच्या या मुख्य कार्यक्रमापूर्वी पालकमंत्री शंभूराज देसाई यांनी पोवई नाका येथील छत्रपती शिवाजी महाराज यांच्या पुतळ्यास पुष्पहार घालून अभिवादन केले तसेच कर्नल संतोष महाडिक स्मृती उद्यानामध्ये जाऊन शूरवीरांना आदरांजली अर्पण केली.)