साताऱ्यात लक्ष्मीपूजनासाठी केरसुणी अन् लाह्या-बत्ताशांची जोरदार खरेदी; बाजारपेठेत लगबग
थेट WhatsApp वर मिळवा
दिवाळी सणातील सर्वात महत्त्वाच्या मानल्या जाणाऱ्या लक्ष्मीपूजनासाठी साताऱ्यात जय्यत तयारी सुरू असून, घरोघरी पूजेसाठी लागणारी केरसुणी आणि साळीच्या लाह्या-बत्ताशांच्या खरेदीला नागरिकांकडून मोठा प्रतिसाद मिळत आहे.
स्थैर्य, सातारा, दि. ०८ नोव्हेंबर : आगामी दीपावली सणात रविवारी उत्साहात साजरा होणाऱ्या लक्ष्मीपूजनाच्या पार्श्वभूमीवर सातारा शहरातील बाजारपेठांमध्ये खरेदीसाठी नागरिकांची गर्दी होऊ लागली आहे. पूजेमध्ये स्वच्छता आणि समृद्धीचे प्रतीक मानल्या जाणाऱ्या केरसुणीसह साळीच्या लाह्या आणि बत्ताशांच्या खरेदीला विशेष प्राधान्य दिले जात असून, सातारच्या सदाशिव पेठेत यासाठी विविध स्टॉल उभारण्यात आले आहेत.
सदाशिव पेठेत विक्रीची रेलचेल
दीपावली सणात घरोघरी होणाऱ्या लक्ष्मीपूजनाच्या पूजेमध्ये घराची स्वच्छता करणारी केरसुणी अत्यंत महत्त्वाची मानली जाते. परंपरेनुसार केरसुणीला लक्ष्मीचे रूप मानले जात असल्याने घरोघरी तिची विधीवत पूजा केली जाते. या पार्श्वभूमीवर सातारा शहरातील सदाशिव पेठेत केरसुण्या विक्रीसाठी मोठ्या प्रमाणावर उपलब्ध झाल्या असून, नागरिक आवर्जून त्यांची खरेदी करत आहेत.
लाह्या आणि बत्ताशांना विशेष मागणी
लक्ष्मीपूजनाच्या पूजेत साळीच्या लाह्या, बत्तासे तसेच साखर कांडी यांना धार्मिक व सांस्कृतिकदृष्ट्या विशेष स्थान असते. पूजेचे हे महत्त्वाचे साहित्य उपलब्ध करून देण्यासाठी शहरभरात विशेष स्टॉलची उभारणी करण्यात आली आहे. या स्टॉलवर लाह्या आणि बत्ताशांच्या खरेदीसाठी ग्राहकांची रेलचेल पाहायला मिळत असून, या साहित्याच्या विक्रीतून उलाढाल वाढली आहे.
