पनीर ऐवजी ‘चीज ॲनालॉग’चा वापर; ग्राहकांची दिशाभूल करणाऱ्या हॉटेल व फास्ट फूड व्यावसायिकांवर होणार कठोर कारवाई!
हॉटेल, रेस्टॉरंट आणि फास्ट फूड सेंटरमध्ये अन्नपदार्थ तयार करताना पनीर ऐवजी ‘चीज ॲनालॉग’चा वापर करून ग्राहकांची फसवणूक करणाऱ्यांवर अन्न व औषध प्रशासन (FDA) कडक कारवाई करणार आहे. मेन्यूकार्डवर स्पष्ट उल्लेख करणे आता बंधनकारक करण्यात आले आहे.
स्थैर्य, फलटण, दि. ६ मे : काही हॉटेल, रेस्टॉरंट व्यावसायिक, केटरर्स आणि फास्ट फूड विक्रेते अन्नपदार्थ तयार करताना ‘पनीर’ (Paneer) ऐवजी पनीरसारख्याच दिसणाऱ्या ‘चीज ॲनालॉग’चा (Cheese Analogue) मोठ्या प्रमाणावर वापर करत आहेत. पनीर आणि चीज ॲनालॉग हे दोन्ही पदार्थ दिसायला एकसारखे असले, तरी त्यांचे पोषणमूल्य पूर्णपणे वेगळे आहे. याविषयी ग्राहकांना कोणतीही पुरेशी माहिती न देता त्यांची दिशाभूल आणि फसवणूक केली जात असल्याच्या अनेक तक्रारी अन्न व औषध प्रशासन (FDA) विभागाकडे प्राप्त झाल्या आहेत. याची गंभीर दखल घेत, अशा व्यावसायिकांवर कठोर कारवाई करण्याचा इशारा प्रशासनाकडून देण्यात आला आहे.
■ मेन्यूकार्ड आणि डिस्प्ले बोर्डवर उल्लेख बंधनकारक:
महाराष्ट्र राज्याचे अन्न सुरक्षा आयुक्त यांनी याप्रकरणी कडक निर्देश जारी केले आहेत. या नवीन नियमांनुसार, हॉटेल, रेस्टॉरंट, केटरर्स आणि फास्ट फूड विक्रेत्यांनी त्यांच्या आस्थापनेमध्ये ‘पनीर’ किंवा ‘चीज ॲनालॉग’ यापैकी नेमक्या कोणत्या पदार्थाचा वापर केला आहे, याचा स्पष्ट उल्लेख त्यांच्या मेन्यूकार्डवर आणि डिस्प्ले बोर्डवर करणे आता प्रशासनाने बंधनकारक केले आहे.
■ उत्पादक आणि विक्रेत्यांसाठी नवीन नियमावली:
-
सर्व उत्पादकांनी त्यांच्या विक्री बिलामध्ये ते नेमक्या कोणत्या अन्नपदार्थाची (पनीर की चीज ॲनालॉग) विक्री करत आहेत, याचा स्वयंस्पष्ट उल्लेख करणे आवश्यक आहे.
-
पनीर आणि चीज ॲनालॉग या पदार्थांची उघड्यावर विक्री न करता, ती केवळ लेबलवर स्पष्ट वर्णन असलेल्या पॅकबंद पाकिटांमधूनच करण्यात यावी.
■ नियमांचे उल्लंघन केल्यास कडक कारवाई:
अन्न व औषध प्रशासन विभागाने अत्यंत स्पष्ट शब्दांत इशारा दिला आहे की, सर्व उत्पादक, हॉटेल व रेस्टॉरंट व्यावसायिक, केटरर्स आणि फास्ट फूड विक्रेत्यांनी या निर्देशांचे काटेकोरपणे पालन केले पाहिजे. जर कोणी या नियमांचे उल्लंघन करताना किंवा ग्राहकांची दिशाभूल करताना आढळल्यास, त्यांच्यावर अन्न सुरक्षा कायद्यांतर्गत अत्यंत कठोर कारवाई करण्यात येईल.
