पीएफ खात्यातून ७५% रक्कम काढणे आता अधिक सोपे; १ वर्षाच्या सेवेनंतर मिळणार मोठी सवलत
ईपीएफओने पीएफ काढण्याच्या नियमांत शिथिलता आणली असून कर्मचाऱ्यांना १ वर्षाच्या सेवेनंतर खात्यातील ७५ टक्के रक्कम काढता येणार आहे.
स्थैर्य, सातारा,दि. ११ सप्टेंबर : कर्मचाऱ्यांच्या तातडीच्या आर्थिक गरजा पूर्ण करण्यासाठी कर्मचारी भविष्य निर्वाह निधी संघटनेने (EPFO) पीएफ काढण्याच्या नियमांमध्ये महत्त्वपूर्ण बदल केले आहेत. नव्या नियमांनुसार, आता अवघी १ वर्षाची सेवा पूर्ण केलेले कर्मचारी आपल्या ईपीएफ खात्यात जमा असलेल्या एकूण रक्कमेपैकी तब्बल ७५ टक्क्यांपर्यंत रक्कम काढू शकणार आहेत. या निर्णयामुळे कोट्यवधी पगारदार कर्मचाऱ्यांना मोठा दिलासा मिळाला आहे.
आणीबाणीच्या आणि वैयक्तिक कामांसाठी मिळणार निधी
वैद्यकीय उपचार, शिक्षण, लग्न किंवा इतर तातडीच्या प्रसंगी कर्मचाऱ्यांना पैशांची गरज भासते. पूर्वी पीएफमधून अंशिक रक्कम काढण्यासाठी अनेक किचकट अटी आणि दीर्घ सेवा कालावधीची अट होती. मात्र, आता १ वर्षाची सलग सेवा पूर्ण असणाऱ्या कोणत्याही कर्मचाऱ्याला सहजपणे ऑनलाईन अर्जाद्वारे ७५% रक्कम काढता येणार आहे, तर उर्वरित २५% रक्कम खात्यात सुरक्षित राहून त्यावर नियमित व्याज मिळत राहील.
डिजिटल आणि कागदपत्रमुक्त प्रक्रियेवर भर
ईपीएफओने आपल्या डिजिटल सेवा अधिक सुलभ केल्या असून उमंग (UMANG) ॲप किंवा ईपीएफओच्या अधिकृत पोर्टलवरून अवघ्या काही मिनिटांत ऑनलाईन क्लेम दाखल करता येतो. आधार कार्ड लिंक असलेल्या खात्यांसाठी ही क्लेम प्रक्रिया तीन ते पाच दिवसांत पूर्ण करून थेट कर्मचाऱ्याच्या बँक खात्यात रक्कम वर्ग केली जात आहे.
