फलटणच्या यशवंत बँकेवर ईडीची धाड? शहरात चर्चांना उधाण
थेट WhatsApp वर मिळवा
फलटणमधील यशवंत सहकारी बँकेवर आणि आजी-माजी संचालकांवर ईडीने छापेमारी केल्याची चर्चा. अधिकृत दुजोरा नाही, मात्र शहरात खळबळ. वाचा सविस्तर.
स्थैर्य, फलटण, दि. २३ डिसेंबर : फलटणमधील यशवंत सहकारी बँकेच्या कार्यालयावर आणि आजी-माजी संचालकांवर सक्तवसुली संचालनालयाने (ED) छापेमारी केल्याची प्राथमिक माहिती समोर येत आहे. या कथित कारवाईबाबत अद्याप कोणतीही अधिकृत माहिती प्रशासकीय यंत्रणेकडून देण्यात आली नसली, तरी या वृत्ताने फलटण शहरात आणि सहकार क्षेत्रात मोठी खळबळ उडाली आहे.
शहरात आज सकाळपासूनच यशवंत सहकारी बँकेवर ईडीने धाड टाकल्याच्या चर्चांना उधाण आले आहे. प्राथमिक माहितीनुसार, बँकेचे मुख्य कार्यालय आणि काही संचालकांच्या मालमत्तांची चौकशी सुरू असल्याचे बोलले जात आहे. मात्र, ही कारवाई नक्की कशासाठी सुरू आहे आणि यात कोणते तथ्य आहे, याबाबत ‘स्थैर्य’ कोणताही दुजोरा देत नाही.
बँकेचे तत्कालीन अध्यक्ष शेखर चरेगावकर यांच्यावर यापूर्वीच आर्थिक अनियमिततेचे विविध गंभीर आरोप झाले आहेत. त्यांच्या विरोधात विविध ठिकाणी गुन्हे देखील दाखल करण्यात आले होते. हे संपूर्ण प्रकरण आता ईडीकडे वर्ग करण्यात आले असून, त्या अनुषंगानेच ही छापेमारी सुरू असल्याची चर्चा नागरिकांमध्ये रंगली आहे.
या कारवाईबाबत अद्याप कोणत्याही तपास यंत्रणेने किंवा स्थानिक प्रशासनाने अधिकृत प्रतिक्रिया दिलेली नाही. त्यामुळे या छाप्यांचे स्वरूप आणि व्याप्ती याबाबत संभ्रम कायम आहे. मात्र, जर ही कारवाई सत्य असेल तर फलटणच्या सहकार क्षेत्रातील ही एक मोठी घडामोड ठरणार आहे.
टीप: सदर बातमी शहरात सुरू असलेल्या प्राथमिक चर्चेवर आधारित असून, ‘स्थैर्य’ या वृत्ताला अधिकृत दुजोरा देत नाही. प्रशासकीय माहिती मिळताच सविस्तर वृत्त प्रसिद्ध केले जाईल.
