ड्रग इंजेक्शन रॅकेटचा सातार्‍यात पर्दाफाश
दैनिक स्थैर्य । 10 मे 2025। सातारा । सातारा शहरामध्ये नशेसाठी वापरण्यात येणार्‍या ड्रग इंजेक्शन रॅकेटचा सातारा शहर पोलीस ठाण्याच्या गुन्हे प्रकटीकरण शाखेने पर्दाफाश केला आहे. या प्रकरणामध्ये एकूण पाच जणांना अटक करण्यात आली आहे. त्यांच्याकडून एकूण 5 लाख 15 हजार रुपयांचा मुद्देमाल जप्त करण्यात आला आहे.
शिवराज पंकज कणसे (वय 24, रा. हिलटॉप सोसायटी शाहूनगर गोडोली), साईकुमार महादेव बनसोडे (वय 25, रा. भोसे, ता. पंढरपूर), सुदीप संजय इंगळे (वय 19, रा. कोयना सोसायटी, सदरबझार), अतुल विलास ठोंबरे (वय 20, रा. झेडपी कॉलनी, शाहूपुरी सातारा), तयब हाफिस खान (वय 23, रा. बांगुरनगर, गोरेगाव मुंबई) यांना अटक करण्यात आली आहे.
या कारवाईमुळे सातार्‍यातील नशेखोर प्रवृत्ती उघड झाल्या आहेत. पोलीस अधीक्षक समीर शेख, अप्पर पोलीस अधीक्षक डॉ. वैशाली कडुकर यांच्या मार्गदर्शनाखाली सातारा शहर पोलीस ठाण्याचे पोलीस निरीक्षक राजेंद्र मस्केयांच्या ही कारवाई पथकाने केली. नशा करणार्‍या काही युवकांची माहिती गुन्हे प्रकटीकरण शाखेला गेल्या दोन महिन्यांपासून होती. हे पथक त्या युवकांवर नजर ठेवून होते. मात्र, शिवराज कणसे हा आपण सापडू नये, याची दक्षता बाळगत होता. डीबी पथकाने सलग दोन महिने गोपनीयरित्या तपास करून, हे इंजेक्शन पुरवणार्‍या युवकांची माहिती मिळवली. या युवकाकडून या मालाची चोरटी विक्री केली जात होती. तो माल विक्री करण्यासाठी 2 मे रोजी चार भिंती परिसरात येणार असल्याची माहिती पोलिसांना मिळाली. त्यानुसार परिसरात सापळा रचण्यात आला. संशयित युवक चार भिंती परिसरात एका बंद टपरीच्या आडोशाला संशयास्पदरित्या आढळून आला होता.
पोलिसांनी त्याला ताब्यात घेतले आणि त्याची झडती घेतली असता, त्याच्याकडे नशेसाठी वापरण्यात येणार्‍या इंजेक्शनच्या 30 बाटल्या आढळून आल्या. या युवकाने प्रथम उडवाउडवीचीची उत्तरे दिली. त्यामुळे त्याला अटक करून, पोलिसांनी न्यायालयाकडून त्याची पोलीस कोठडी मिळवली आणि सखोल चौकशी केली असता, ही इंजेक्शन मुंबई येथून एका युवकाकडून चोरट्या पद्धतीने खरेदी केले आणि नशा करणार्‍या युवकांना त्याचा थोड्या थोड्या प्रमाणात पुरवठा होत असल्याचे संशयित युवकाने सांगितले. त्या चारही युवकांना अटक करण्यात आली आहे.
