साताऱ्यात ‘देवस्थान भूमी संरक्षण परिषद’ उत्साहात संपन्न; इनाम निर्मूलन कायदा रद्द करण्याचा विश्वस्त व पुजाऱ्यांचा निर्धार
स्थैर्य, सातारा, दि. २१ जून : महाराष्ट्र मंदिर महासंघाच्या वतीने शनिवारी (दि. २० जून) साताऱ्यातील बॉम्बे रेस्टॉरंट चौकाजवळील नटराज मंदिरात ‘देवस्थान भूमी संरक्षण परिषद’ अत्यंत उत्साहात आणि यशस्वीरीत्या पार पडली. या परिषदेत मंदिरांच्या जमिनींचे संरक्षण, शासनाच्या प्रस्तावित ‘इनाम निर्मूलन कायद्या’ला विरोध आणि मंदिर विश्वस्त, पुजारी व सर्व हिंदू संघटनांनी एकत्र येण्याची गरज, या महत्त्वपूर्ण मुद्द्यांवर सविस्तर चर्चा करण्यात आली.
परिषदेतील प्रमुख घडामोडी आणि मार्गदर्शन:
-
उद्देश व आढावा: परिषदेची सुरुवात शंखनादाने करण्यात आली. सौ. रूपा महाडिक यांनी प्रास्ताविकात मंदिरांची मालमत्ता व संस्कृती वाचवण्यासाठी हिंदूंनी संघटित होण्याची गरज विषद केली. त्यानंतर सातारा जिल्हा मंदिर महासंघाचे संयोजक शिवाजीराव तुपे यांनी जिल्ह्यातील महासंघाच्या आतापर्यंतच्या कार्याचा आढावा सादर केला.
-
कायद्याला प्रखर विरोध: हेमंत सोनवणे यांनी देवस्थानच्या जमिनी हडपण्याच्या कोणत्याही प्रयत्नाविरोधात महासंघ शेवटपर्यंत लढा देईल, अशी ठाम भूमिका मांडली. तर, ॲड. संदीप कांबळे यांनी प्रस्तावित कायद्यावर टीका करत हा लढा केवळ जमिनीचा नसून, संस्कृती आणि वारसा जतन करण्याचा असल्याचे स्पष्ट केले.
-
कायमचा रद्द करा: मंदिर महासंघाचे राष्ट्रीय संघटक सुनील घनवट यांनी उपस्थित विश्वस्तांना मार्गदर्शन करताना सांगितले की, “देवस्थानची भूमी ही देवाची संपत्ती असून तिचे रक्षण करणे हे प्रत्येक हिंदू आणि विश्वस्तांचे आद्य कर्तव्य आहे.” शासनाने ‘महाराष्ट्र देवस्थान इनाम निर्मूलन अधिनियम २०२६’ केवळ स्थगित केला आहे, तो पूर्णपणे रद्द झालेला नाही, याकडे त्यांनी सर्वांचे लक्ष वेधले. तसेच, राज्यातील देवस्थान जमिनींच्या संरक्षणासाठी स्वतंत्र यंत्रणा उभारण्याची प्रमुख मागणी त्यांनी केली.
-
पुजाऱ्यांच्या व्यथा: गुरव समाजाचे प्रतिनिधी शरद गुरव यांनी अनेक पिढ्यांपासून मंदिरांची सेवा करणाऱ्या समाजाच्या व्यथा आणि अडचणी या परिषदेत मांडल्या.
मान्यवरांचा सत्कार:
याप्रसंगी ॲड. दत्तात्रय कुलकर्णी यांच्या हस्ते मंदिर महासंघाचे राष्ट्रीय संघटक सुनील घनवट यांचा सत्कार करण्यात आला. तसेच, ॲड. जनार्दन करपे, संयोजक शिवाजीराव तुपे, गजानन भोसले आणि ॲड. संदीप कांबळे यांचाही विशेष सत्कार करण्यात आला. कार्यक्रमाचे सूत्रसंचालन सौ. भक्ती डाफळे यांनी केले.
English Headline:
