दहीगावमधील चोरीच्या निषेधार्थ फलटणमध्ये भव्य मोर्चा; कडक कारवाईसाठी जैन समाज आक्रमक
थेट WhatsApp वर मिळवा
दहीगाव (ता. माळशिरस) येथील धार्मिक स्थळात झालेल्या चोरीच्या निषेधार्थ फलटणमध्ये जैन समाजाने भव्य मोर्चा काढला. यावेळी प्रशासनाला निवेदन देऊन आरोपींवर त्वरित आणि कडक कारवाई करण्याची मागणी करण्यात आली.
स्थैर्य, फलटण, दि. १० ऑगस्ट : दहीगाव (ता. माळशिरस) येथील एका धार्मिक स्थळात नुकत्याच झालेल्या चोरीच्या घटनेच्या निषेधार्थ फलटणमधील जैन समाजाच्या वतीने भव्य मोर्चा काढण्यात आला. आचार्य गुप्तीनंदी गुरुदेव यांच्या सानिध्यात काढण्यात आलेल्या या मोर्चाद्वारे तहसीलदारांना निवेदन देऊन दोषींवर कठोर कारवाईची मागणी करण्यात आली आहे.
बाजारपेठ बंद ठेवून निषेध
शहरातील सहस्रकुट दिगंबर जैन मंदिर धर्मशाळेपासून या मोर्चाला सुरुवात झाली. गजानन चौक मार्गे हा मोर्चा प्रांत कार्यालयावर पोहोचला. या घटनेचा निषेध नोंदवण्यासाठी मोर्चा संपेपर्यंत समाजातील सर्व बांधवांनी आपापले व्यापार आणि दुकाने बंद ठेवली होती. मोर्चामध्ये महिला व युवक मंडळे, मंदिरांचे विश्वस्त आणि चातुर्मास समितीचे सदस्य मोठ्या संख्येने सहभागी झाले होते.
कारवाईसाठी प्रशासनाला निवेदन
प्रांत कार्यालयात पोहोचल्यानंतर समाज बांधवांनी तहसीलदार अभिजीत जाधव यांना मागण्यांचे सविस्तर निवेदन दिले. अहिंसा युवक कमिटीचे संस्थापक अध्यक्ष सागर दोशी यांनी या घटनेचा तातडीने तपास करून संशयितांना लवकरात लवकर अटक करण्याची मागणी केली. तसेच भविष्यात अशा घटना घडू नयेत यासाठी प्रशासनाने योग्य ती काळजी घ्यावी, अशी अपेक्षाही यावेळी व्यक्त करण्यात आली.
मान्यवरांची उपस्थिती
या मोर्चामध्ये नगरसेविका सिद्धाली शहा, स्मिता शहा, अनुप शहा, सुरज दोशी, सुनय दोशी, सागर गांधी, स्वरूप व्होरा, निलेश दोशी, अमित मेहता, यशराज गांधी, मयूर शहा, आलोक दोशी, मंगेश दोशी आणि सूर्यकांत दोशी यांच्यासह समाज बांधव मोठ्या संख्येने उपस्थित होते.
