चारा पिकांच्या लागवडीसाठी शेतकऱ्यांना मोठे अनुदान; मका, ज्वारी आणि नेपिअर गवतासाठी मिळणार इतकी मदत

दैनिक स्थैर्य • WhatsApp Channel
सातारा जिल्ह्यातील ताज्या बातम्या
थेट WhatsApp वर मिळवा
WhatsApp Channel JOIN करा ›

राज्यातील दुष्काळी परिस्थितीत पशुधनाला हिरवा चारा उपलब्ध व्हावा यासाठी रोजगार हमी योजनेतून मका, ज्वारी आणि नेपिअर गवतासह सात चारा पिकांना हेक्टरी अनुदान जाहीर झाले आहे.

स्थैर्य, सातारा, दि. २२ नोव्हेंबर : राज्यातील दुष्काळी परिस्थिती आणि संभाव्य चारा टंचाईवर मात करण्यासाठी राज्य सरकारने पशुपालक व शेतकऱ्यांना मोठा दिलासा दिला आहे. रोजगार हमी योजनेअंतर्गत विविध सात चारा पिकांच्या लागवडीसाठी रोपे, बियाणे, मजुरी आणि साहित्यासाठी हेक्टरी आर्थिक तरतूद निश्चित करण्यात आली आहे. या निर्णयामुळे ग्रामीण भागातील मजुरांना रोजगार मिळण्यासोबतच जनावरांसाठी मुबलक हिरवा चारा उपलब्ध होण्यास मदत होणार आहे.

कोणत्या चारा पिकासाठी किती मिळणार अनुदान?

शासनाने जाहीर केलेल्या निकषांनुसार प्रति हेक्टर कमाल एक लाख १३ हजार २९० रुपयांपर्यंतचा अंदाज मंजूर करण्यात आला आहे. यामध्ये बाजरी लागवडीसाठी ३५ हजार ५०५ रुपये, ज्वारीसाठी ४२ हजार ७७८ रुपये, तर मका लागवडीसाठी ४७ हजार ३०७ रुपयांचे अनुदान निश्चित केले आहे. याशिवाय नेपिअर गवत लागवडीसाठी ७६ हजार ३१ रुपये व १५५ मनुष्यदिवस, तर मेथी घास अर्थात ल्युसर्न पिकासाठी सर्वाधिक अनुदान आणि मजुरी दिवसांची तरतूद करण्यात आली आहे.

लाभ घेण्यासाठी आवश्यक अटी आणि अर्ज प्रक्रिया

या योजनेचा लाभ घेण्यासाठी इच्छुक शेतकऱ्यांकडे स्वतःची शेतजमीन, पाण्याची खात्रीशीर सोय आणि रोजगार हमी योजनेचे जॉब कार्ड असणे आवश्यक आहे. मका, ज्वारी, बाजरी, नेपिअर गवत, ल्युसर्न आणि बहुकापणी ज्वारी-बाजरी या सात पिकांचा यात समावेश करण्यात आला आहे. या योजनेत सहभागी होण्यासाठी शेतकऱ्यांनी आपल्या ग्रामपंचायत कार्यालयात किंवा तालुका कृषी व पशुसंवर्धन विभागाशी संपर्क साधून विहित नमुन्यात अर्ज सादर करावा, असे आवाहन प्रशासनाने केले आहे.

 

 

हे देखील वाचा

Back to top button
कॉपी करू नका..!