कोळकीतील विकासकामांत अडथळे आणणाऱ्यांची चौकशी करा! पंचायत समिती सभेत भाजप सदस्य विकास नाळे यांचा घणाघात

फलटण पंचायत समितीच्या मासिक सभेत कोळकी गणाचे भाजप सदस्य विकास नाळे यांनी गिरवी पाणीपुरवठा योजना, रस्त्याच्या कामामुळे फुटणाऱ्या पाईपलाईन आणि कोळकीतील विकासकामांच्या निविदा प्रक्रियेतील अनियमिततेबाबत आवाज उठवला. सभापतींकडून चौकशीचे आदेश.

स्थैर्य, फलटण, दि. 15 एप्रिल : फलटण पंचायत समितीच्या नुकत्याच पार पडलेल्या मासिक सर्वसाधारण सभेत माजी खासदार रणजितसिंह नाईक निंबाळकर यांच्या नेतृत्वाखालील भारतीय जनता पार्टीचे कोळकी पंचायत समिती गणाचे सदस्य विकास नाळे यांनी मतदारसंघातील विविध प्रलंबित प्रश्नांवर आणि नागरिकांच्या गैरसोयींवर जोरदार आवाज उठवला. त्यांच्या आक्रमक भूमिकेनंतर सभापतींनी एका गंभीर प्रकरणात तत्काळ चौकशीचे आदेश दिले आहेत.

या सभेत सदस्य विकास नाळे यांनी प्रामुख्याने खालील चार महत्त्वाचे मुद्दे उपस्थित करून प्रशासनाचे लक्ष वेधले:

‘गिरवी प्रादेशिक पाणीपुरवठा योजना’ सोलरवर कार्यान्वित करा:

सभेत बोलताना विकास नाळे यांनी निदर्शनास आणून दिले की, गिरवी प्रादेशिक पाणीपुरवठा योजना ही सुरुवातीला १४ गावांसाठी होती. मात्र, आता इतर गावांच्या स्वतंत्र पाणीपुरवठा योजना कार्यान्वित झाल्याने ही योजना केवळ ६ गावांसाठी मर्यादित राहिली आहे. या ६ गावांचे महसुली उत्पन्न कमी असल्याने योजनेचे मोठे लाईट बिल भरणे व देखभाल-दुरुस्ती करणे त्यांना शक्य होत नाही; त्यामुळे ही योजना अडचणीत सापडली आहे. ऐन उन्हाळ्यात व दुष्काळी परिस्थितीत या गावांना पाण्याची टंचाई भासू नये, यासाठी ही संपूर्ण योजना ‘सोलर सिस्टीम’द्वारे (सौर ऊर्जा) कार्यान्वित करण्यात यावी, अशी अत्यंत महत्त्वाची मागणी त्यांनी केली.

रस्त्याच्या कामामुळे फुटणाऱ्या पाईपलाईनकडे लक्ष द्या:

सध्या फलटण ते दहिवडी रस्त्याचे कामकाज सुरू आहे. मात्र, या कामादरम्यान विविध पाणीपुरवठा योजनांच्या पाईपलाईन वारंवार फुटत असल्याचा प्रकार घडत आहे. या गंभीर बाबीकडे प्रशासन आणि संबंधित ठेकेदार जाणीवपूर्वक दुर्लक्ष करत आहेत. ऐन उन्हाळ्यात नागरिकांना नाहक पाण्यासाठी वणवण भटकावे लागत आहे. त्यामुळे प्रशासनाने संबंधित अधिकारी आणि ठेकेदारांना तत्काळ योग्य ते कडक निर्देश देऊन ही समस्या सोडवावी, असा मुद्दा नाळे यांनी मांडला.

कोळकीत स्वतंत्र ‘डीपी’ (DP) बसवा:

कोळकी गावातील काही भागांमध्ये अत्यंत कमी दाबाने (Low Voltage) विद्युत पुरवठा होत असल्याच्या वाढत्या तक्रारी आहेत. त्यामुळे नागरिकांचे मोठे नुकसान होत आहे. ज्या ठिकाणी असा कमी दाबाने वीजपुरवठा होतो, त्या ठिकाणी महावितरणने तातडीने स्वतंत्र ‘डीपी’ (ट्रान्सफॉर्मर) उपलब्ध करून द्यावा, अशी आग्रही मागणी विकास नाळे यांनी सभेत केली.

कोळकीतील निविदा (टेंडर) प्रक्रियेची चौकशी करा:

कोळकी ग्रामपंचायतीचे पूर्वीचे सरपंच आणि विद्यमान प्रशासक गावातील विकासकामांमध्ये जाणीवपूर्वक अडथळे निर्माण करत असल्याचा गंभीर आरोप विकास नाळे यांनी केला. सामाजिक हिताच्या आणि खऱ्या अर्थाने गरजेच्या असलेल्या कामांचे टेंडर ओपन करू न देता, केवळ स्वतःच्या फायद्याचे टेंडर ओपन केल्याचे त्यांनी सभागृहाच्या निदर्शनास आणून दिले. या गंभीर आरोपांची तत्काळ दखल घेत पंचायत समितीच्या सभापतींनी या प्रकरणाची विस्तार अधिकाऱ्यांमार्फत सखोल चौकशी करून अहवाल सादर करण्याचे थेट आदेश दिले आहेत.

पंचायत समितीच्या या सभेत विकास नाळे यांनी मांडलेल्या या अभ्यासपूर्ण आणि आक्रमक मुद्द्यांमुळे कोळकी आणि परिसरातील पाणी, वीज आणि विकासकामांच्या प्रश्नांना मोठी वाचा फुटली आहे.