फलटण तालुक्याच्या हरितक्रांतीसाठी मोठे पाऊल; वनविभागातर्फे ४५ हजार वृक्षांची होणार लागवड
पर्यावरण संवर्धनासाठी फलटणमध्ये वनविभागातर्फे अटल आनंद घन वन प्रकल्पाचा शुभारंभ करण्यात आला. मियावाकी पद्धतीने तब्बल ४५ हजार वृक्षांची लागवड केली जाणार आहे.
स्थैर्य, फलटण, दि. ०८ ऑगस्ट : पर्यावरण संवर्धन आणि जैवविविधतेचे संरक्षण करण्याच्या उद्देशाने फलटण येथे वनविभागातर्फे ‘अटल आनंद घन वन प्रकल्पा’चा शुभारंभ करण्यात आला. महाराष्ट्र पत्रकार कल्याण निधीचे अध्यक्ष रवींद्र बेडकीहाळ यांच्या हस्ते वडाचे रोप लावून या महत्त्वपूर्ण उपक्रमाची सुरुवात करण्यात आली. या प्रकल्पांतर्गत तब्बल ४५ हजार वृक्षांची लागवड केली जाणार आहे.
मियावाकी पद्धतीने घनवन उभारणी
वनविभागाच्या कार्यालयाशेजारील सुमारे दीड हेक्टर क्षेत्रावर मियावाकी पद्धतीने या वृक्षांची लागवड केली जाणार आहे. वनक्षेत्रपाल निकिता बोटकर यांनी या प्रकल्पाची माहिती दिली. स्थानिक हवामानाला पोषक अशा विविध प्रजातींची लागवड केल्यामुळे हरितक्षेत्र वाढेल, भूजल पातळी सुधारेल आणि तापमान नियंत्रणास मोठी मदत होईल, असे त्यांनी स्पष्ट केले.
हरितक्रांतीच्या दिशेने महत्त्वाचे पाऊल
हा प्रकल्प फलटण तालुक्याच्या हरितक्रांतीच्या दिशेने टाकलेले पहिले आणि महत्त्वाचे पाऊल असल्याचे रवींद्र बेडकीहाळ यांनी सांगितले. हा उपक्रम केवळ शहरापुरता मर्यादित न ठेवता परिसरातील टेकड्या, किल्ले आणि मोकळ्या जागांवरही राबवल्यास संपूर्ण तालुका हिरवागार होईल, असा विश्वास त्यांनी व्यक्त केला. यावेळी वनपाल नितीन जगदाळे, वनरक्षक आश्विनी लोखंडे यांच्यासह अनेक पर्यावरणप्रेमी आणि नागरिक मोठ्या संख्येने उपस्थित होते.
