‘अजिंक्यतारा’ची शेतकऱ्यांना मोठी भेट! ऊस बिलापोटी २१३ कोटी ५० लाख रुपये बँक खात्यात जमा; प्रति टन ३५०० रुपये दर

साताऱ्यातील अजिंक्यतारा सहकारी साखर कारखान्याने २०२५-२६ गळीत हंगामातील उसाचे तब्बल २१३ कोटी ५० लाख रुपयांचे संपूर्ण पेमेंट शेतकऱ्यांच्या बँक खात्यात जमा केले आहे. कारखान्याने यंदा प्रति टन ३५०० रुपये दर दिला आहे.

स्थैर्य, सातारा : गाळपास येणाऱ्या उसाला अवघ्या १५ दिवसांच्या आत पेमेंट करणारा कारखाना अशी संपूर्ण राज्यात ख्याती असलेल्या साताऱ्यातील ‘अजिंक्यतारा सहकारी साखर कारखान्याने’ शेतकऱ्यांना मोठा दिलासा दिला आहे. सन २०२५-२६ च्या गळीत हंगामात गाळप झालेल्या उसाचे संपूर्ण पेमेंट, म्हणजेच तब्बल २१३ कोटी ५० लाख रुपये, संबंधित ऊस पुरवठादार शेतकऱ्यांच्या बँक खात्यात जमा करण्यात आले आहेत. कारखान्याचे चेअरमन यशवंत साळुंखे यांनी प्रसिद्धीपत्रकाद्वारे ही माहिती दिली.

मंत्री शिवेंद्रराजेंच्या मार्गदर्शनाखाली यशस्वी घोडदौड

राज्याचे सार्वजनिक बांधकाम मंत्री श्रीमंत छ. शिवेंद्रसिंहराजे भोसले यांच्या मार्गदर्शनाखाली अजिंक्यतारा कारखान्याचे कामकाज अत्यंत नियोजनबद्धरीत्या सुरू आहे. ऊस पुरवठादार सभासद आणि शेतकऱ्यांना नेहमीच उच्चतम दर देण्याची आपली गौरवशाली परंपरा कारखान्याने यावर्षीही कायम जोपासली आहे.

२०२५-२६ गळीत हंगामाची ठळक वैशिष्ट्ये :

• हंगामाचा कालावधी: दि. ३ नोव्हेंबर २०२५ रोजी सुरू झालेल्या या गळीत हंगामाची सांगता नुकतीच दि. २६ फेब्रुवारी २०२६ रोजी झाली.

• एकूण ऊस गाळप: या हंगामात एकूण ६ लाख १० हजार मेट्रिक टन उसाचे यशस्वी गाळप करण्यात आले.

  

• साखर उत्पादन व उतारा: १२.७४ टक्के एवढ्या चांगल्या साखर उताऱ्याने तब्बल ६ लाख ९६ हजार ६१७ साखर पोत्यांचे उत्पादन घेण्यात आले.

  

• प्रति टन दर: कारखान्याने या हंगामात गाळपास आलेल्या उसाला प्रति टन ३५०० रुपये एवढा उच्चांकी दर दिला आहे.

“कारखान्याने गाळप झालेल्या एकूण उसाचे होणारे संपूर्ण बिल रक्कम रुपये २१३ कोटी ५० लाख संबंधित ऊस पुरवठादार शेतकऱ्यांच्या बँक खात्यात जमा केले आहेत. सर्व संबंधित शेतकऱ्यांनी आपल्या बँकेच्या शाखेत जाऊन ऊस बिल जमा झाल्याची खात्री करून घ्यावी.”

– यशवंत साळुंखे (चेअरमन, अजिंक्यतारा सहकारी साखर कारखाना)