मानाची साडी, चांदीचे नाणे अन् आकर्षक भेटवस्तूंची लयलूट; कु. सिद्धाली अनुप शहा यांच्या वतीने २६ जानेवारीला हळदी-कुंकू!
थेट WhatsApp वर मिळवा
स्थैर्य, फलटण, दि. २० जानेवारी : सौभाग्याचे लेणे आणि मांगल्याचा सण असलेल्या मकरसंक्रांतीचे आणि भारतीय लोकशाहीच्या उत्सवाचे म्हणजेच ‘प्रजासत्ताक दिनाचे’ औचित्य साधून माऊली फौंडेशन व नवनिर्वाचित नगरसेविका कु. सिद्धाली अनुप शहा यांच्या वतीने भव्य ‘हळदी-कुंकू’ समारंभाचे आयोजन करण्यात आले आहे. सोमवार, दिनांक २६ जानेवारी २०२६ रोजी सायंकाळी ६ वाजता फलटण येथील अहिंसा मैदान, बारस्कर गल्ली येथे हा सोहळा संपन्न होणार आहे.
या कार्यक्रमासाठी प्रमुख उपस्थिती म्हणून सातारा जिल्हा परिषदेच्या माजी सदस्या आणि भाजप नेत्या सौ. जिजामाला नाईक निंबाळकर उपस्थित राहणार आहेत. नवनिर्वाचित नगरसेविका कु. सिद्धाली शहा यांनी आपल्या प्रभागातील महिला भगिनींशी संवाद साधण्यासाठी आणि स्नेहवृद्धीसाठी या कार्यक्रमाचे आयोजन केले आहे.
आकर्षक बक्षिसे आणि भेटवस्तूंची रेलचेल:
कार्यक्रमात सहभागी होणाऱ्या महिलांसाठी विशेष आकर्षण म्हणून विविध भेटवस्तूंचे आयोजन करण्यात आले आहे. यामध्ये मानाची साडी (५ महिलांना), मिक्सर, चांदीचे नाणे, इस्त्री, हॉट पॉट, टिफिन, ज्युसर आणि १ किलो साखर (५ महिलांना) अशा आकर्षक वस्तूंचा समावेश आहे. महिलांच्या कलागुणांना वाव मिळावा आणि त्यांच्यात आनंद निर्माण व्हावा, या उद्देशाने हे बक्षीस वितरण होणार असल्याचे आयोजकांनी सांगितले आहे.
फलटण नगरपरिषदेच्या प्रभाग क्रमांक ८ मधून विक्रमी मतांनी निवडून आल्यानंतर कु. सिद्धाली अनुप शहा यांचा हा पहिलाच मोठा सार्वजनिक कार्यक्रम असल्याने प्रभागातील महिलांमध्ये उत्साहाचे वातावरण आहे. “सांस्कृतिक वारसा जपतानाच महिलांचे संघटन करणे आणि त्यांना हक्काचे व्यासपीठ मिळवून देणे हा या मागील उद्देश आहे,” असे मत कु. सिद्धाली शहा यांनी व्यक्त केले.
तरी या भव्य हळदी-कुंकू समारंभासाठी परिसरातील सर्व महिला भगिनींनी मोठ्या संख्येने उपस्थित राहावे, असे आवाहन माऊली फौंडेशन आणि नगरसेविका कु. सिद्धाली अनुप शहा यांच्या वतीने करण्यात आले आहे.
कार्यक्रमाचा तपशील:
दिनांक: सोमवार, २६ जानेवारी २०२६ (प्रजासत्ताक दिन)
वेळ: सायंकाळी ठीक ६:०० वाजता
स्थळ: अहिंसा मैदान, बारस्कर गल्ली, फलटण.
प्रमुख उपस्थिती: सौ. जिजामाला नाईक निंबाळकर.
निमंत्रक: कु. सिद्धाली अनुप शहा (नगरसेविका, फलटण नगरपरिषद)
