‘सत्यशोधक विवाहाचे सर्व जाती-धर्मांमध्ये अनुकरण व्हावे’; प्रा. करिष्मा मुलाणी व प्रा. श्रेयस कांबळे यांचा आंतरधर्मीय सत्यशोधक विवाह संपन्न!

थोर समाजसुधारक महात्मा ज्योतिराव फुले यांच्या द्विशताब्दी जयंतीनिमित्त फलटणमध्ये प्रा. अॅड. करिष्मा मुलाणी आणि प्रा. श्रेयस कांबळे यांचा ५६ वा आंतरधर्मीय सत्यशोधक विवाह सोहळा मोठ्या उत्साहात पार पडला.

स्थैर्य, फलटण, दि. ४ मे : “सत्यशोधक विवाह हा सत्यावर आधारित असल्याने सर्व जाती-धर्मांमध्ये त्याचे अनुकरण व्हावे,” असे प्रतिपादन सत्यशोधक रघुनाथ ढोक यांनी केले. थोर समाजसुधारक महात्मा ज्योतिराव फुले यांच्या द्विशताब्दी जयंतीनिमित्त फुले-शाहू-आंबेडकर एज्युकेशनल अँड सोशल फाउंडेशनच्या ‘बहुउद्देशीय सत्यशोधक केंद्रा’तर्फे प्रा. अॅड. करिष्मा मुलाणी आणि प्रा. श्रेयस कांबळे यांचा ५६ वा आंतरधर्मीय ‘मोफत सत्यशोधक विवाह’ सोहळा मोठ्या उत्साहात संपन्न झाला.

हा विवाह सोहळा रविवारी (दि. ३ मे) सायंकाळी ६ वाजता जाधववाडी (फलटण) येथील अक्षत रेसिडेन्सीमध्ये मोजक्या मित्रमंडळी व नातेवाईकांच्या उपस्थितीत पार पडला.

■ विवाह सोहळ्यातील प्रमुख वैशिष्ट्ये:

संविधान आणि समग्र वाङ्मय हाती घेऊन प्रवेश: नवदांपत्याच्या हातात भारताचे संविधान आणि समग्र वाङ्मय देऊन विवाह सोहळ्याच्या ठिकाणी त्यांचे आगमन झाले. त्यानंतर महात्मा फुले व सावित्रीबाई फुले यांच्या प्रतिमांना हार अर्पण करून पूजन करण्यात आले.
महात्मा फुलेंच्या वेशभूषेत विधी: विवाहाची अधिकृत नोंदणी करून महात्मा फुले यांच्या वेशभूषेत सर्व विधी पार पाडण्यात आले. यावेळी संस्थेचे अध्यक्ष व विधीकर्ते सत्यशोधक रघुनाथ ढोक यांच्या हस्ते नवदांपत्याला ‘सत्यशोधक विवाह प्रमाणपत्र’ तसेच महात्मा फुले आणि क्रांतीज्योती सावित्रीबाई फुले यांची प्रतिमा भेट देण्यात आली.
उद्देशिकेचे वाचन व फुलांच्या पाकळ्यांचा वापर: या कार्यक्रमात राष्ट्रीय ओबीसी महासंघाचे विश्वस्त प्रा. सुदाम धाडगे यांनी भारतीय राज्यघटनेच्या उद्देशिकेचे वाचन केले. तसेच, महात्मा फुले रचित मंगलाष्टकांचे सादरीकरण करण्यात आले. विशेष म्हणजे, या विवाहात पारंपरिक अक्षतांच्या ऐवजी सुगंधी फुलांच्या पाकळ्यांचा वापर करण्यात आला.
शपथपत्र व काव्यसादरीकरण: प्रा. श्रेयस कांबळे व प्रा. करिष्मा मुलाणी यांनी शपथपत्राचे वाचन करून संविधानिक मूल्यांवर आधारित जीवन जगण्याचा संकल्प व्यक्त केला आणि निर्भय व सत्यशोधक समाज घडविण्याचे आश्वासन दिले. आभार प्रदर्शन करताना करिष्मा मुलाणी यांनी ‘तयास मानव म्हणावे का’ ही कविता सादर केली, तर कांबळे कुटुंबीयांनीही काव्यसादरीकरण करून कार्यक्रमाची रंगत वाढवली.

यावेळी विवाह सोहळ्याला उपस्थित राहिलेल्या सर्व पाहुण्यांना ‘ज्ञानज्योती सावित्रीबाई फुले’ हा ग्रंथ आणि गुलाबाचे रोप भेट म्हणून देण्यात आले.

या प्रसंगी पत्रकार विकास शिंदे, पत्रकार जयदीप भगत, ज्येष्ठ समाजसेवक दादा कांबळे, विजय आमने, लॉ कॉलेजचे विद्यार्थी-विद्यार्थिनी, प्राध्यापक व इतर मान्यवर उपस्थित होते. उपस्थितांनी नवदांपत्याचे अभिनंदन करत त्यांच्या या धाडसी आणि कृतीशील विचारसरणीचे मोठे कौतुक केले.