जागतिक मधुमेह दिन; लहान मुलांमधील ‘या’ सुरुवातीच्या लक्षणांकडे अजिबात दुर्लक्ष करू नका
थेट WhatsApp वर मिळवा
लहान मुलांमध्ये मधुमेहाचे प्रमाण झपाट्याने वाढत असून, जागतिक मधुमेह दिनानिमित्त पालकांनी मुलांमधील सुरुवातीच्या लक्षणांबाबत सतर्क राहणे गरजेचे बनले आहे.
स्थैर्य, सातारा, दि. १४ नोव्हेंबर : बदलती जीवनशैली, फास्ट फूडचे वाढते आकर्षण आणि मैदानी खेळांचा अभाव यामुळे केवळ प्रौढांमध्येच नव्हे, तर लहान मुलांमध्येही मधुमेहाचा धोका झपाट्याने वाढत आहे. जागतिक मधुमेह दिनाच्या निमित्ताने वैद्यकीय तज्ज्ञांनी पालकांना सतर्क राहण्याचे आवाहन केले असून, मुलांच्या शरीरात दिसणाऱ्या काही प्राथमिक बदलांकडे दुर्लक्ष केल्यास हा आजार गंभीर रूप धारण करू शकतो, असा इशारा दिला आहे.
मुलांमध्ये दिसणारी प्रमुख लक्षणे
मुलांमध्ये टाइप-१ किंवा टाइप-२ मधुमेह सुरू होण्यापूर्वी शरीरात काही विशिष्ट बदल दिसून येतात. यामध्ये वारंवार लघवीला होणे, विशेषतः रात्रीच्या वेळी अंथरूण ओले करणे, तसेच नेहमीपेक्षा जास्त तहान लागणे आणि पाणी पिऊनही तहान न भागणे या प्रमुख लक्षणांचा समावेश होतो. याशिवाय, चांगला आहार घेऊनही मुलाचे वजन अचानक कमी होणे, सतत थकवा व चिडचिडेपणा जाणवणे आणि दृष्टी धूसर होणे ही मधुमेहाची सुरुवातीची लक्षणे असू शकतात.
वेळीच निदान आणि प्रतिबंधात्मक उपाय
मुलांमध्ये ही लक्षणे आढळल्यास पालकांनी कोणताही विलंब न करता तातडीने बालरोगतज्ज्ञ किंवा मधुमेह तज्ज्ञांचा सल्ला घेऊन रक्तातील साखरेची तपासणी करून घ्यावी. वेळेवर निदान झाल्यास योग्य आहार, नियमित व्यायाम आणि डॉक्टरांच्या मार्गदर्शनाखालील उपचारांद्वारे मुलांचे आरोग्य सुरक्षित ठेवता येते. पालकांनी मुलांच्या दैनंदिन आहारातून साखरयुक्त पेये व जंक फूड कमी करून पौष्टिक अन्नाचा समावेश करावा, असा सल्लाही तज्ज्ञांनी दिला आहे.
