दुष्काळग्रस्त भागातील गर्भवती महिलांसाठी विशेष पाऊल; आहार आणि आरोग्यासाठी शासनाकडून प्रभावी उपाययोजना
थेट WhatsApp वर मिळवा
महिला आणि बालविकास विभागाकडून राज्यातील दुष्काळग्रस्त व अतिसंवेदनशील भागातील गर्भवती महिला, स्तनदा माता आणि बालकांच्या आरोग्यासाठी विशेष पावले उचलण्यात आली आहेत.
स्थैर्य, सातारा, दि. १५ नोव्हेंबर : दुष्काळग्रस्त आणि कुपोषणाचा धोका असलेल्या ग्रामीण भागातील महिला व बालकांच्या पोषणाचा प्रश्न मार्गी लावण्यासाठी महिला आणि बालविकास विभागाने विशेष उपाययोजना हाती घेतल्या आहेत. या उपक्रमांतर्गत गर्भवती महिला आणि स्तनदा मातांच्या आहारविषयक गरजा पूर्ण करण्यावर भर दिला जाणार असून, त्यांना योग्य पोषण मिळावे यासाठी विशेष समुपदेशन सत्रे आयोजित केली जात आहेत.
माता व बालकांच्या आरोग्याला प्राधान्य
राज्यातील १ लाखांहून अधिक अंगणवाड्यांच्या माध्यमातून बालकांच्या वाढीवर व आरोग्यावर काटेकोर लक्ष ठेवले जात आहे. डिसेंबर २०२६ पर्यंत सर्व बालकांच्या वजन आणि उंचीची नोंद करण्याचे उद्दिष्ट ठेवण्यात आले असून, याद्वारे बालकांच्या शारीरिक विकासाचे नियमित निरीक्षण केले जाणार आहे. तसेच कुपोषण रोखण्यासाठी आरोग्य यंत्रणेला अधिक सक्रिय करण्यात आले आहे.
अतिउष्णतेचा धोका असलेल्या जिल्ह्यांमध्ये विशेष सोयी
हवामानातील बदलांचा आणि वाढत्या उष्णतेचा बालकांच्या आरोग्यावर विपरीत परिणाम होऊ नये, म्हणून उष्णतेचा अधिक धोका असलेल्या १५ जिल्ह्यांमधील अंगणवाड्यांमध्ये परावर्तित छतांची (Reflective Roofs) व्यवस्था करण्याचे नियोजन करण्यात आले आहे. याशिवाय, बालकांच्या सर्वांगीण विकासासाठी सात जिल्ह्यांतील ४४ तालुक्यांमध्ये ‘वात्सल्य प्लस’ उपक्रम राबविला जात असून, अंगणवाडी सेविकांसह आशा आणि एएनएम कर्मचाऱ्यांनाही विशेष प्रशिक्षण देण्यात आले आहे.
