जेईई ॲडव्हान्स २०२७ परीक्षा २३ मे रोजी; पात्रता आणि नव्या मार्गदर्शक तत्त्वांची घोषणा
थेट WhatsApp वर मिळवा
इंजिनीअरिंगच्या प्रवेशासाठी अत्यंत महत्त्वाची मानली जाणारी ‘जेईई ॲडव्हान्स २०२७’ (JEE Advanced 2027) परीक्षेची तारीख आणि सविस्तर पात्रता निकष अधिकृतपणे जाहीर करण्यात आले आहेत.
स्थैर्य, सातारा, दि. १५ नोव्हेंबर : देशातील प्रतिथयश भारतीय तंत्रज्ञान संस्थांमध्ये (IIT) प्रवेशासाठी घेतली जाणारी संयुक्त प्रवेश परीक्षा अर्थात जेईई ॲडव्हान्स २०२७ चा सुधारित कार्यक्रम जाहीर झाला आहे. यंदा ही परीक्षा २३ मे २०२७ रोजी घेतली जाणार असून, आयआयटी दिल्लीच्या वतीने याविषयीची नियमावली व पात्रता अटी स्पष्ट करण्यात आल्या आहेत.
परीक्षेचे वेळापत्रक आणि स्वरूप
आयआयटी दिल्लीच्या नियोजनानुसार, २३ मे २०२७ रोजी होणारी ही परीक्षा नेहमीप्रमाणे दोन सत्रांमध्ये (पेपर १ आणि पेपर २) संगणक आधारित पद्धतीने घेतली जाईल. यामध्ये सहभागी होण्यासाठी विद्यार्थ्यांना आधी मुख्य परीक्षा पार करावी लागणार आहे. तसेच परीक्षेदरम्यान विद्यार्थ्यांना मूलभूत गणनेसाठी ऑन-स्क्रीन कॅल्क्युलेटर वापरण्याची सुविधा देखील उपलब्ध करून दिली जाणार आहे.
पात्रता निकष आणि अट
या परीक्षेसाठी अर्ज करू इच्छिणाऱ्या विद्यार्थ्यांना जेईई मेन २०२७ च्या बी.ई./बी.टेक. पेपरमध्ये यशस्वी होऊन गुणवत्तेच्या आधारे टॉप २ लाख ५० हजार उमेदवारांमध्ये स्थान मिळवणे बंधनकारक असेल. तसेच ज्या विद्यार्थ्यांनी २०२६ किंवा २०२७ मध्ये प्रथमच इयत्ता १२ वीची परीक्षा दिली आहे, तेच या परीक्षेसाठी पात्र ठरणार आहेत. विद्यार्थी कमाल दोन वेळा सलग वर्षांमध्ये ही परीक्षा देऊ शकतात.
