वाठार : गहाळ झालेले २५ मोबाईल पोलिसांकडून हस्तगत – नागरिकांना दिलासा

वाठार पोलीस स्टेशनच्या पथकाने सायबर पोलिसांच्या मदतीने नागरिकांचे गहाळ झालेले सहा लाख पंधरा हजार रुपये किमतीचे एकूण २५ मोबाईल हस्तगत करून त्यांना परत केले.

स्थैर्य, वाठार, दि. 14 जून : वाठार पोलीस स्टेशनच्या गुन्हे प्रकटीकरण पथकाने आणि सातारा सायबर पोलिसांनी संयुक्त कारवाई करत नागरिकांचे गहाळ झालेले ६,१५,००० रुपये किमतीचे तब्बल २५ मोबाईल शोधून काढले आहेत. हस्तगत करण्यात आलेले हे मोबाईल त्यांच्या मूळ मालकांना परत करण्यात आले आहेत.

तांत्रिक तपासातून उलगडा

नागरिकांचे गहाळ झालेले मोबाईल शोधण्यासाठी सहाय्यक पोलीस निरीक्षक सुशील भोसले यांनी गुन्हे प्रकटीकरण (डीबी) पथकाला विशेष सूचना दिल्या होत्या. या पथकाने सातारा सायबर पोलिसांच्या मदतीने तांत्रिक बाबींचा कसून तपास केला. महाराष्ट्र आणि इतर राज्यांत वापरले जाणारे हे मोबाईल शोधून काढण्यासाठी धारकांशी वारंवार संपर्क साधण्यात आला. या चिकाटीच्या तपासामुळे परिसरातील नागरिकांचे गहाळ झालेले २५ मोबाईल हस्तगत करण्यात पोलिसांना मोठे यश आले.

मोहीम यापुढेही सुरू राहणार

हस्तगत केलेले सर्व मोबाईल आवश्यक प्रक्रिया पूर्ण करून संबंधित नागरिकांना सुपूर्द करण्यात आले आहेत. गहाळ मोबाईल शोधण्याची ही मोहीम यापुढेही सातत्याने राबवली जाईल, अशी माहिती सुशील भोसले यांनी दिली.

कारवाईत सहभागी अधिकारी व कर्मचारी

पोलीस अधीक्षक निखिल पिंगळे, अपर पोलीस अधीक्षक वैशाली कडुकर आणि उपविभागीय पोलीस अधिकारी राजश्री तेरणी यांच्या मार्गदर्शनाखाली ही कारवाई करण्यात आली. यामध्ये सुशील भोसले, पोलीस उपनिरीक्षक गहिनीनाथ सातव, नितीन भोसले यांच्यासह तानाजी चव्हाण, उदय जाधव, जितेंद्र शिंदे, प्रकाश चव्हाण, विठ्ठल काळे, प्रथमेश अलगुडे, प्रशांत गोरे, प्रतीक देशमुख, आशा देशमुख आणि सातारा सायबर पोलिसांचा सक्रिय सहभाग होता.