यु-डायस प्लस प्रणालीत विद्यार्थी नोंदणीसाठी ३० सप्टेंबरपर्यंत मुदत; शिक्षण विभागाचे शाळांना आदेश
थेट WhatsApp वर मिळवा
राज्यातील शाळांना इयत्ता २ री ते १२ वीपर्यंतच्या उर्वरित विद्यार्थ्यांची यु-डायस प्लस पोर्टलवर नोंदणी पूर्ण करण्यासाठी ३० सप्टेंबरपर्यंत मुदत देण्यात आली आहे.
स्थैर्य,सातारा, दि. २४ सप्टेंबर : केंद्र सरकारच्या सूचनेनुसार राज्यातील इयत्ता २ री ते १२ वीपर्यंतच्या ज्या विद्यार्थ्यांची ‘यु-डायस प्लस’ (UDISE+) प्रणालीमध्ये अद्याप नोंदणी झालेली नाही, त्यांची नोंदणी तातडीने पूर्ण करण्याचे स्पष्ट निर्देश शिक्षण विभागाने दिले आहेत. शाळांना ही प्रक्रिया पूर्ण करण्यासाठी ३० सप्टेंबरपर्यंतची अंतिम मुदत देण्यात आली असून, सर्व शाळांनी निश्चित वेळेत विद्यार्थी डेटा अद्ययावत करणे बंधनकारक करण्यात आले आहे.
विद्यार्थी प्रगती नोंदणी आणि डेटा अद्ययावत करणे अनिवार्य
यु-डायस प्लस प्रणाली अंतर्गत चालू शैक्षणिक वर्षात विद्यार्थ्यांचे प्रोग्रेशन (पुढील वर्गात प्रवेश नोंदवणे) आणि नवीन प्रवेश घेतलेल्या विद्यार्थ्यांची माहिती नोंदवण्याचे काम सुरु आहे. शैक्षणिक नियोजन, शासकीय योजनांचा थेट लाभ आणि आपार आयडी (APAAR ID) निर्मितीसाठी हा डेटा अत्यंत महत्त्वाचा मानला जातो. मात्र, काही शाळांमध्ये अद्यापही अनेक विद्यार्थ्यांची माहिती प्रणालीवर अपलोड व्हायची राहिल्याने शिक्षण प्रशासनाने ही ताकीद दिली आहे.
मुदतीत काम न झाल्यास शाळांवर कारवाईचा इशारा
दिलेल्या मुदतीनंतर यु-डायस प्लस पोर्टलवरील विद्यार्थी नोंदणीची लिंक बंद केली जाणार आहे. मुदतीत नोंदणी न करणाऱ्या अथवा चुकीची माहिती भरणार्या शाळांवर प्रशासकीय कारवाई केली जाईल, असा इशारा शिक्षण अधिकाऱ्यांनी दिला आहे. त्यामुळे राज्यातील सर्व व्यवस्थापनांच्या शाळांनी उरलेल्या दिवसांत मोहीम राबवून १०० टक्के विद्यार्थी नोंदणी पूर्ण करावी, असे आवाहन करण्यात आले आहे.
