
दैनिक स्थैर्य । दि. १२ ऑगस्ट २०२२ । उंब्रज । अल्पवयीन मुलीस धमकी देत रेकॉर्डवरील गुन्हेगाराने पळवून नेले. या घटनेची माहिती मिळताच कराड ग्रामिण पोलिसांनी तपास करत रेकॉर्डवरील गुन्हेगाराला शोधून काढले. त्याच्या तावडीतून अल्पवयीन मुलीची सुटका करण्यात आली. याप्रकरणी रेकॉर्डवरील गुन्हेगारावर अपहरणासह बालविवाह प्रकरणी गुन्हा दाखल करण्यात आला आहे.
पोलिसांकडून मिळालेली माहिती अशी, उंब्रज पोलीस ठाण्याच्या हद्दीतील एक रेकॉर्डवरील गुन्हेगार काही कालावधीसाठी तडीपार होता. तडीपारीच्या कालावधीत तो विंग परिसरात काही काळ वास्तव्यास होता. याचवेळी त्याची अल्पवयीन मुलीची ओळख झाली. दरम्यान तडीपारीचा कालावधी संपल्यानंतर त्याने मुलीला धमकावत पळवून नेले. तिच्याशी बालविवाह केला. याप्रकरणी कराड ग्रामिण पोलिसात फिर्याद दाखल झाली. पोलीस उपअधिक्षक रणजीत पाटील, पोलीस निरिक्षक आनंदराव खोबरे यांच्या मार्गदर्शनाखाली सहाय्यक पोलीस निरिक्षक रेखा दुधभाते यांच्यासह पोलिसांंनी या गुन्ह्याचा तपास सुरू केला. तपासात रेकॉर्डवरील गुन्हेगारासह मुलीचा शोध लागला. पोलिसांनी संबंधित ठिकाणी छापा टाकून संशयिताला अटक केले. अल्पवयीन मुलीची सुटका केली. संशयितावर बालविवाहासह अपहरणाचा गुन्हा दाखल झाला आहे.