८ व्या वेतन आयोगात पगार किती वाढणार? फिटमेंट फॅक्टर आणि महागाई भत्त्याबाबत मोठी अपडेट समोर
थेट WhatsApp वर मिळवा
८ व्या वेतन आयोगाच्या शिफारशींमुळे केंद्रीय कर्मचाऱ्यांच्या मूळ वेतनात मोठी वाढ होण्याची शक्यता असून नव्या फिटमेंट फॅक्टरमुळे पगारवाढीचे गणित बदलणार आहे.
स्थैर्य,सातारा, दि. २२ सप्टेंबर : केंद्रीय कर्मचारी आणि निवृत्तीवेतनधारकांसाठी अत्यंत महत्त्वाच्या ठरणाऱ्या आठव्या वेतन आयोगाच्या कामकाजाने वेग घेतला आहे. नव्या वेतन आयोगात कर्मचाऱ्यांच्या मूळ वेतनात २० टक्क्यांपासून ते तब्बल ५० टक्क्यांपर्यंत घसघशीत वाढ होण्याची शक्यता वर्तवली जात आहे. यामध्ये फिटमेंट फॅक्टर आणि महागाई भत्त्याचे मूळ वेतनातील विलीनीकरण हे दोन अत्यंत कळीचे मुद्दे ठरणार असून याबाबत कर्मचारी संघटनांकडून विविध मागण्या जोर धरू लागल्या आहेत.
फिटमेंट फॅक्टरमुळे किमान पगार बदलणार
सातव्या वेतन आयोगात २.५७ फिटमेंट फॅक्टर लागू करण्यात आला होता, ज्यामुळे कर्मचाऱ्यांचे किमान मूळ वेतन १८ हजार रुपये झाले होते. आता आठव्या वेतन आयोगासाठी २.२८ ते ३.६८ या दरम्यान फिटमेंट फॅक्टर ठेवण्याची मागणी कर्मचारी संघटनांनी केली आहे. जर सरकारने २.५७ किंवा त्याहून अधिक गुणक मंजूर केला, तर कर्मचाऱ्यांचे किमान मूळ वेतन ३४ हजार ते ५० हजार रुपयांच्या घरात पोहोचू शकते, ज्याचा थेट फायदा सव्वा कोटी कर्मचाऱ्यांना होणार आहे.
महागाई भत्ता आणि एचआरएमध्ये सुधारणा
वाढत्या महागाईचा विचार करता सध्याचा महागाई भत्ता मूळ वेतनात विलीन करून नवीन वेतनश्रेणीत डीए शून्यावरून सुरू करण्याची मागणी केली जात आहे. याशिवाय, मेट्रो आणि इतर प्रमुख शहरांमधील वाढत्या घरभाड्यामुळे घरभाडे भत्त्यात (HRA) वाढ करून तो १२ टक्के, २४ टक्के आणि ३६ टक्के करण्याची शिफारस करण्यात येत आहे. या सर्व बदलांमुळे कर्मचाऱ्यांचा टेक-होम पगार, पीएफ आणि निवृत्तीवेतनात मोठी वाढ पाहायला मिळणार आहे.
