साखरेचे भाव ३० टक्क्यांनी घसरले; कारखान्यात दर कमी होऊनही दुकानांत अधिक दराने विक्री
थेट WhatsApp वर मिळवा
साखर कारखाना पातळीवर दर ३० टक्क्यांनी घसरले तरी किरकोळ बाजारात अजूनही ६० ते ७० रुपयांनी विक्री सुरू आहे.
स्थैर्य, सातारा, दि. ०४ सप्टेंबर : साखरेच्या वाढत्या दरामुळे त्रस्त झालेल्या ग्राहकांसाठी दिलासादायक बातमी समोर आली आहे. साखर कारखान्यांच्या पातळीवर म्हणजेच एक्स-मिल भावात जवळपास ३० टक्क्यांची घसरण झाली आहे. मात्र या घसरणीचा थेट फायदा अद्याप किरकोळ बाजारातील ग्राहकांपर्यंत पोहोचलेला नाही. दुकानांमध्ये साखर अजूनही ६० ते ७० रुपये किंवा त्याहून अधिक दराने विकली जात असल्याचे समोर आले आहे.
एक्स-मिल भाव आणि दुकानातील दरातील तफावत
कारखान्यातून साखर बाहेर पडताना ज्या दराने विकली जाते, त्याला एक्स-मिल भाव म्हणतात. यापूर्वी कारखान्यांमधून साखर सुमारे ६७ रुपये किलो दराने विकली जात होती, तो भाव आता ४७ रुपयांपर्यंत खाली आला आहे. मात्र किरकोळ व्यापाऱ्यांकडे आधीच जास्त दराने खरेदी केलेला जुना साठा उपलब्ध असल्याने नवीन साठ्याचा कमी दर बाजारात दिसण्यासाठी काही वेळ लागण्याची शक्यता आहे.
सरकारच्या उपाययोजना आणि भविष्यातील चित्र
साखरेच्या दरावर नियंत्रण आणण्यासाठी केंद्र सरकारने १० लाख टन कच्ची साखर आयात करण्यास परवानगी दिली आहे. याशिवाय साठेबाजी रोखण्यासाठी घाऊक खरेदीदारांच्या साठ्यावर मर्यादा घालण्यात आली आहे. सरकारी निर्णयांनंतर कारखाना स्तरावर दर घसरल्याने येत्या काही दिवसांत किरकोळ बाजारातही साखरेचे दर कमी होऊन ग्राहकांना दिलासा मिळण्याची शक्यता आहे.
