हमीभावाने शेतमाल खरेदी; राज्यातील २८ जिल्ह्यांत सोयाबीन, तूर आणि उडीद खरेदीचे नियोजन
थेट WhatsApp वर मिळवा
राज्यातील शेतकऱ्यांना शेतमालाला योग्य मोबदला मिळवून देण्यासाठी खरीप हंगामात हमीभाव खरेदी केंद्रांच्या माध्यमातून सोयाबीन, तूर आणि उडीद खरेदी करण्याचे नियोजन राज्य शासनाकडून करण्यात आले आहे.
स्थैर्य, सातारा, दि. १५ ऑक्टोबर : राज्यातील शेतकऱ्यांच्या शेतमालाला योग्य भाव मिळावा यासाठी केंद्र व राज्य सरकारच्या वतीने हमीभाव (MSP) खरेदी योजना राबवली जाते. यंदाच्या खरीप हंगामात राज्यातील २८ जिल्ह्यांमध्ये सोयाबीन, तूर आणि उडीद या पिकांच्या खरेदीसाठी व्यापक नियोजन करण्यात आले असून, यासाठी राज्यभरात ९५० पेक्षा अधिक खरेदी केंद्र उभारण्यात येणार आहेत.
नवीन हमीभाव आणि खरेदीची तयारी
शासनाकडून जाहीर करण्यात आलेल्या नव्या दरांनुसार यंदा सोयाबीनला प्रति क्विंटल ५,७०८ रुपये, तुरीला ८,४५० रुपये तर उडदाला ८,२0० रुपयांपर्यंतचा हमीभाव मिळणार आहे. मागील वर्षाच्या तुलनेत या दरांमध्ये वाढ करण्यात आल्यामुळे शेतकऱ्यांना मोठा आर्थिक दिलासा मिळण्याची अपेक्षा आहे. बाजारात पिकांची आवक वाढू लागल्याने शेतकऱ्यांनी वेळेत नोंदणी करून या शासकीय केंद्रांचा लाभ घ्यावा, असे आवाहन करण्यात आले आहे.
पारदर्शक यंत्रणा आणि साठवणूक व्यवस्था
खरेदी केंद्रांवर पारदर्शकता राहावी यासाठी डिजिटल प्रणालीचा वापर केला जाणार असून, शेतकऱ्यांच्या पैशांची थेट बँक खात्यात जमा प्रक्रिया सुलभ करण्यात आली आहे. तसेच खरेदी केलेल्या शेतमालाच्या सुरक्षित साठवणुकीसाठी १५ लाख टनांहून अधिक क्षमतेची साठवणूक व्यवस्था उभारण्यात आली असून, यामुळे उत्पादक शेतकऱ्यांना मोठा आधार मिळणार आहे.
