भगवद्गीता स्पर्धेत यश मिळवलेल्या फलटणच्या श्रीनी तगारेचा बंगळूरमध्ये सन्मान
भगवद्गीता स्पर्धेत प्रथम आलेल्या फलटणच्या श्रीनी तगारेचा बंगळूरमध्ये इस्रोचे माजी अध्यक्ष एस. सोमनाथन यांच्या हस्ते नॅशनल टॉपर्स अवॉर्ड देऊन सन्मान.
स्थैर्य, फलटण, दि. ११ जुलै : श्रीराम एज्युकेशन सोसायटीच्या यशवंतराव चव्हाण हायस्कूल व जुनिअर कॉलेजची विद्यार्थिनी श्रीनी मयूर तगारे हिने इस्कॉन आयोजित भगवद्गीता स्पर्धेत फलटण आणि माण तालुक्यात प्रथम क्रमांक मिळवला आहे. या यशाबद्दल तिची बंगळूर येथील इस्रो भेटीसाठी निवड झाली असून, तिला इस्रोच्या माजी अध्यक्षांच्या हस्ते नॅशनल टॉपर्स अवॉर्डने गौरवण्यात आले आहे.
सुवर्णपदक देऊन सन्मान
नुकत्याच बंगळूर येथे झालेल्या एका भव्य समारंभात श्रीनी तगारे हिला इस्रोचे माजी अध्यक्ष आणि एरोनॉटिकल सोसायटी ऑफ इंडियाचे विद्यमान राष्ट्रीय अध्यक्ष डॉ. एस. सोमनाथन यांच्या हस्ते सुवर्णपदक (नॅशनल टॉपर्स अवॉर्ड) देऊन गौरवण्यात आले. या राष्ट्रीय स्तरावरील कार्यक्रमाला देशभरातील ५० गुणवंत विद्यार्थी उपस्थित होते.
मान्यवरांकडून कौतुक
श्रीनीने मिळवलेल्या या राष्ट्रीय स्तरावरील यशाबद्दल श्रीराम एज्युकेशन सोसायटीच्या अध्यक्षा सविता सूर्यवंशी-बेडके आणि सचिव डॉ. सचिन सूर्यवंशी-बेडके यांनी तिचे विशेष अभिनंदन केले. तसेच नियामक मंडळ सदस्य महेंद्र सूर्यवंशी-बेडके, ज्योती सूर्यवंशी-बेडके, विद्यालयाच्या प्राचार्या गायकवाड आणि उपप्राचार्य घनवट यांनीही श्रीनीचे कौतुक करून पुढील शैक्षणिक वाटचालीस शुभेच्छा दिल्या.
