नगरपरिषद प्रारूप प्रभाग रचनेवर हरकतींचा पाऊस; मुदतीअखेर ९७ अर्ज दाखल

स्थैर्य, फलटण, दि. ३१ ऑगस्ट : फलटण नगरपरिषदेच्या आगामी निवडणुकीसाठी प्रसिद्ध करण्यात आलेल्या प्रारूप प्रभाग रचनेवर हरकती आणि सूचना दाखल करण्याची मुदत आज, दि. ३१ ऑगस्ट रोजी संपली. मुदतीच्या शेवटच्या दिवसाअखेर प्रशासनाकडे एकूण ९७ हरकती दाखल झाल्या आहेत, अशी माहिती फलटण नगरपरिषदेचे मुख्याधिकारी श्री. निखिल मोरे यांनी दिली.

प्रशासनाकडून मिळालेल्या माहितीनुसार, दाखल झालेल्या एकूण ९७ हरकतींपैकी अनेक अर्ज हे एकाच स्वरूपाचे आहेत. मात्र, प्रत्येक वेगळा विषय किंवा आशय असणाऱ्या एकूण १२ मूळ हरकती असल्याचे मुख्याधिकारी श्री. मोरे यांनी स्पष्ट केले. या हरकतींमुळे प्रभाग रचनेबाबत नागरिकांमध्ये आणि राजकीय वर्तुळात मोठी उत्सुकता असल्याचे दिसून येत आहे.

आता दाखल झालेल्या या सर्व हरकती पुढील कार्यवाहीसाठी राज्य निवडणूक आयोगाकडे किंवा संबंधित प्राधिकरणाकडे पाठवण्यात येतील. लवकरच या हरकतींवर सुनावणी घेतली जाणार असून, यामध्ये हरकतदारांना आपले म्हणणे मांडण्याची संधी दिली जाईल. या सुनावणीनंतरच नगरपरिषदेची अंतिम प्रभाग रचना प्रसिद्ध केली जाणार असून, त्यानंतरच निवडणुकीच्या पुढील प्रक्रियेला वेग येईल.