शरयू साखर कारखान्यात आगामी गळीत हंगामासाठी ऊस तोडणी व वाहतूक करारांचा शुभारंभ; प्रतिदिन १२ हजार टन गाळप करण्याचे उद्दिष्ट!

फलटण येथील शरयू साखर कारखान्याच्या सन २०२६-२७ च्या गळीत हंगामासाठी ऊस तोडणी आणि वाहतूक करारांचा शुभारंभ करण्यात आला. कार्यकारी संचालक युगेंद्र पवार यांच्या मार्गदर्शनाखाली यावर्षी कारखान्याची गाळप क्षमता वाढवून ती प्रतिदिन १२ हजार टन करण्यात येणार आहे.

स्थैर्य, फलटण, दि. 23 एप्रिल : येथील शरयू साखर कारखान्याच्या आगामी सन २०२६-२७ च्या गळीत हंगामाकरिता ऊस तोडणी आणि वाहतूक करारांचा शुभारंभ आज कारखाना कार्यस्थळावर वाहन ठेकेदारांच्या हस्ते अत्यंत समारंभपूर्वक करण्यात आला.

प्रतिदिन १२ हजार टन गाळपाचे उद्दिष्ट:

आगामी गळीत हंगामात कारखान्याचे कार्यकारी संचालक मा. श्री. युगेंद्रदादा पवार यांच्या कुशल मार्गदर्शनाखाली कारखान्याची गाळप क्षमता लक्षणीयरीत्या वाढवली जाणार आहे. यावर्षी तब्बल १२ हजार मेट्रिक टन प्रतिदिन (TCD) या वाढीव क्षमतेने कारखाना उसाचे गाळप करणार असल्याची माहिती प्रशासनाकडून देण्यात आली आहे.

रस्ते पूर्ण झाल्याने वाहतुकीत येणार सुसूत्रता:

ऊस वाहतुकीच्या दृष्टीने एक अत्यंत दिलासादायक बाब म्हणजे, सातारा-फलटण रस्त्याचे रखडलेले काम आता पूर्ण झाले असून हा रस्ता वाहतुकीसाठी खुला करण्यात आला आहे. यासोबतच परिसरातील अनेक महत्त्वाच्या रस्त्यांची कामेही मार्गी लागली असल्याने आगामी हंगामात ऊस वाहतुकीत मोठी सुसूत्रता आणि वेग येणार आहे. याचा फायदा ऊस उत्पादक आणि वाहतूकदार दोघांनाही होणार आहे. त्यामुळे कार्यक्षेत्रातील जास्तीत जास्त स्थानिक वाहनधारकांनी आपले तोडणी व वाहतूक करार ‘शरयू’ला करण्यासाठी संपर्क साधावा, असे आवाहन कारखान्याच्या शेती खात्याकडून करण्यात आले आहे.

जास्तीत जास्त ऊस नोंदणीचे आवाहन:

सध्या कारखान्याच्या कार्यक्षेत्रातील तसेच लगतच्या क्षेत्रातील ऊस नोंदी घेण्याचे काम शेती विभागामार्फत जोमाने चालू आहे. परिसरातील जास्तीत जास्त शेतकरी बांधवांनी आपला ऊस ‘शरयू’ कारखान्याकडे नोंद करावा, असे आवाहन कारखाना प्रशासनातर्फे करण्यात आले आहे.

या शुभारंभ प्रसंगी कारखान्याचे संचालक अविनाश भापकर, युनिट हेड विजय जगदाळे, शेती अधिकारी अशोक घाडगे, रमेश वाघ, डॉ. गणपत सावंत यांच्यासह कारखान्याचे सर्व विभाग प्रमुख आणि तोडणी-वाहतूक ठेकेदार मोठ्या संख्येने उपस्थित होते.