शरयू ॲग्रोमध्ये १२ व्या गळीत हंगामाचा शुभारंभ; शेतकऱ्यांना सवलतीच्या दरात साखरेची मोठी घोषणा
थेट WhatsApp वर मिळवा
कापशी येथील शरयू ॲग्रो इंडस्ट्रीजमध्ये १२ व्या गळीत हंगामाचा शुभारंभ झाला. ऊस उत्पादक शेतकऱ्यांना सवलतीच्या दरात साखर देण्याची मोठी घोषणा कारखान्याने केली आहे.
स्थैर्य, कापशी, दि. १२ ऑक्टोबर : कापशी येथील शरयू ॲग्रो इंडस्ट्रीज लिमिटेडच्या सन २०२६-२७ च्या १२ व्या गळीत हंगामाचा पारंपरिक मोळीपूजनाने उत्साहात शुभारंभ करण्यात आला. शरयू उद्योग समूहाचे अध्यक्ष श्रीनिवास पवार, शरयू फाउंडेशनच्या अध्यक्षा शर्मिला पवार आणि कार्यकारी संचालक युगेंद्र पवार यांच्या हस्ते हा कार्यक्रम पार पडला.
गाळप क्षमता दुप्पट करण्याचे उद्दिष्ट
यंदाच्या गळीत हंगामासाठी कारखान्याच्या विस्तारवाढीच्या माध्यमातून गाळप क्षमता दुप्पट करण्याच्या दृष्टीने आवश्यक तयारी पूर्ण करण्यात आली आहे. वाढीव गाळप क्षमतेनुसार ऊस गाळपाचे नियोजन, यंत्रसामग्रीची सज्जता आणि ऊस वाहतूक व तोडणी व्यवस्थेवर विशेष भर देण्यात आला आहे. संपूर्ण कार्यक्षेत्रात ऊसतोडणी यंत्रणा दाखल झाल्याने या हंगामाला गती मिळण्याची अपेक्षा आहे.
शेतकऱ्यांना सवलतीच्या दरात साखर
शेतकरी हिताला प्राधान्य देत कारखाना व्यवस्थापनाने दसरा-दिवाळीपूर्वी ऊस पुरवठा करणाऱ्या शेतकऱ्यांसाठी मोठी घोषणा केली आहे. याअंतर्गत शेतकऱ्यांना प्रति टन उसामागे एक किलो साखर सवलतीच्या दरात उपलब्ध करून दिली जाणार आहे. या कार्यक्रमास कारखान्याचे संचालक अविनाश भापकर, युनिट हेड सुरेश पाटील यांच्यासह अधिकारी, कर्मचारी आणि शेतकरी उपस्थित होते.
