साताऱ्याचा पारा ४१ अंशांवर; पाचगणी ३७ तर महाबळेश्वर ३५ अंशांवर, वाढत्या उकाड्याने जनजीवन हैराण
सातारा जिल्ह्यात उन्हाचा कडाका वाढला असून साताऱ्याचे तापमान ४१ अंश, पाचगणीचे ३७ अंश तर महाबळेश्वरचे तापमान ३५ अंशांवर पोहोचले आहे. वाढत्या तापमानामुळे नागरिक आणि पर्यटक त्रस्त झाले आहेत.
स्थैर्य, सातारा, दि. १५ एप्रिल : सातारा जिल्ह्यात मागील काही दिवसांपासून तापमानाचा पारा प्रचंड वेगाने चढू लागला आहे. उन्हाच्या वाढत्या झळांमुळे अवघे जनजीवन होरपळू लागले असून, उकाडा व घामाच्या धारांमुळे नागरिक हैराण झाले आहेत. सलग तिसऱ्या दिवशी साताऱ्याचे कमाल तापमान ४१ अंश सेल्सिअसवर नोंदवले गेले असून, थंड हवेचे ठिकाण म्हणून ओळखले जाणारे पाचगणी आणि महाबळेश्वरही यंदा तापल्याचे चित्र आहे.
थंड हवेची ठिकाणेही तापली; पाचगणी ३७, महाबळेश्वर ३५ अंशांवर
थंड हवेचे ठिकाण म्हणून प्रसिद्ध असलेल्या पाचगणीत यंदा तापमानाने कडेलोट केला आहे. येथील पारा चक्क ३७ अंशांवर पोहोचल्याने स्थानिक नागरिक आणि पर्यटक त्रस्त झाले आहेत. तर दुसरीकडे, महाबळेश्वरचे तापमानही ३५ अंश सेल्सिअसवर पोहोचले आहे. एप्रिल महिन्याच्या मध्यावरच एवढी मोठी उष्णता जाणवू लागल्याने यंदाचा उन्हाळा अधिक तीव्र आणि दाहक असणार असल्याची चिन्हे स्पष्ट दिसू लागली आहेत.
दुपारी रस्त्यांवर शुकशुकाट; शीतपेयांना मागणी
सकाळी ८ वाजल्यापासूनच उन्हाचा चटका आणि घामाच्या धारा वाहण्यास सुरुवात होत आहे. तडाखा वाढल्याने घराबाहेर पडणे मुश्कील झाले असून भर दुपारी रस्त्यांवर अक्षरशः शुकशुकाट दिसून येत आहे. अंगाची लाहीलाही करणाऱ्या या उकाड्यामुळे लहान मुले, ज्येष्ठ नागरिक आणि कामगार वर्गाला मोठा त्रास सहन करावा लागत आहे. उष्म्यातून दिलासा मिळवण्यासाठी थंड पेये, फळांचे रस आणि नारळपाण्याला मागणी प्रचंड वाढली आहे. तसेच विजेचा वापर वाढल्याने वीजपुरवठ्यातही व्यत्यय येत आहे.
पर्यटनावर परिणाम आणि आरोग्याची काळजी घेण्याचे आवाहन
उन्हाळी हंगामात पाचगणी आणि महाबळेश्वरमध्ये पर्यटकांची मोठी गर्दी अपेक्षित असते. मात्र, कडक उन्हामुळे काही पर्यटन स्थळांवर तुलनेने कमी पर्यटक दिसत आहेत. उन्हामुळे बाहेर फिरणे कठीण झाल्याने पर्यटक केवळ सकाळी लवकर किंवा संध्याकाळीच पर्यटनाचा आनंद घेताना दिसत आहेत.
वाढते ऊन आणि उष्म्यामुळे आरोग्याच्या तक्रारीही वाढल्या आहेत. जिल्ह्यात सध्या उष्णतेच्या लाटेसदृश्य परिस्थिती निर्माण झाल्याने नागरिकांनी उष्माघाताचा धोका लक्षात घेऊन आरोग्याबाबत विशेष दक्षता घ्यावी आणि सतर्क राहावे, असा सल्ला प्रशासनाकडून देण्यात आला आहे.
