सातारा जिल्हा बँक निवडणुकीसाठी ठराव प्रक्रियेला सुरुवात; अवैध ठरावावर कारवाईचा इशारा
सातारा जिल्हा मध्यवर्ती सहकारी बँकेच्या संचालक मंडळ निवडणुकीसाठी प्रारूप मतदार यादी तयार करण्याची प्रक्रिया सुरू झाली असून ५ ऑगस्टपर्यंत ठराव सादर करण्याचे आवाहन करण्यात आले आहे.
स्थैर्य, फलटण, दि. ०९ जुलै : सातारा जिल्हा मध्यवर्ती सहकारी बँकेच्या (सन २०२६-२०३१) संचालक मंडळ निवडणुकीसाठी प्रारूप मतदार यादी तयार करण्याच्या प्रक्रियेला सुरुवात झाली आहे. याअंतर्गत सभासद संस्थांकडून प्रतिनिधींचे ठराव मागविण्याची कार्यवाही सुरू झाली असून ५ ऑगस्टपर्यंत हे ठराव स्वीकारले जाणार आहेत, अशी माहिती फलटणचे सहाय्यक निबंधक दाजी खताळ यांनी दिली.
ठराव सादर करण्याची मुदत
संस्था सभासद प्रतिनिधींची प्रारूप मतदार यादी २२ नोव्हेंबर २०२३ या अर्हता दिनांकावर तयार करावयाची आहे. यासाठी संबंधित संस्थांनी आपल्या प्रतिनिधींचे ठराव ७ जुलै ते ५ ऑगस्ट २०२६ या कालावधीत कार्यालयीन वेळेत संबंधित तालुका उप किंवा सहाय्यक निबंधक कार्यालयात जमा करणे अनिवार्य आहे. ठराव स्वीकारण्यासाठी कार्यालयामध्ये स्वतंत्र नोंदवही ठेवण्यात आली आहे.
थकबाकीदार संस्थांना अपात्रता
कायद्यातील तरतुदीनुसार संस्था सभासद बँकेची थकबाकीदार नसावी. तसेच ठरावाद्वारे प्रतिनिधित्व करण्यासाठी निवडलेली व्यक्तीदेखील थकबाकीदार नसावी. प्राथमिक विविध कार्यकारी सहकारी कृषी पतसंस्था जर थकबाकीत असतील, तर त्यांच्या संचालक मंडळाऐवजी थकबाकीदार नसलेल्या एखाद्या सदस्याचा प्रतिनिधी म्हणून समावेश करण्याचा ठराव करावा, असे स्पष्ट करण्यात आले आहे.
अवैध ठराव दिल्यास फौजदारी कारवाई
एका संस्थेमध्ये मूळ ठरावाशिवाय अवैध किंवा दुबार ठराव देण्याची प्रवृत्ती आढळल्यास संबंधित संस्थेचे सचिव आणि पदाधिकाऱ्यांवर महाराष्ट्र सहकारी संस्था अधिनियमानुसार थेट फौजदारी कारवाई प्रस्तावित करण्यात येईल, असा कडक इशारा निवडणूक प्राधिकरणाने दिला आहे.
पारदर्शक कामकाजाची सक्ती
ठराव पारित करताना संस्थेच्या संचालक मंडळाची रीतसर बैठक बोलावणे, नोटीस काढणे आणि उपस्थिती रजिस्टरवर स्वाक्षऱ्या घेणे बंधनकारक आहे. या सर्व प्रक्रियेचे काटेकोर पालन करूनच ठराव कार्यालयास सादर करण्याचे आवाहन फलटणचे सहाय्यक निबंधक दाजी खताळ यांनी सर्व संबंधित संस्थांना केले आहे.
