सांगवीतील दुर्गा दौडवर लोखंडी रॉडने हल्ला; संशयित महिलेला पोलिसांकडून अटक
थेट WhatsApp वर मिळवा
सांगवी (ता. फलटण) येथे दुर्गा दौडमध्ये सहभागी नागरिकांवर आणि एका अल्पवयीन मुलीवर लोखंडी रॉडने हल्ला केल्याप्रकरणी संशयित महिलेला पोलिसांनी अटक केली आहे. नागरिकांनी अफवांवर विश्वास न ठेवण्याचे आवाहन करण्यात आले आहे.
स्थैर्य, फलटण, दि. २१ ऑक्टोबर : सांगवी (ता. फलटण) येथे सकाळी दुर्गा दौड सुरू असताना सहभागी नागरिकांवर आणि एका अल्पवयीन मुलीवर लोखंडी रॉडने हल्ला केल्याचा धक्कादायक प्रकार घडला आहे. याप्रकरणी मयूर दत्तात्रय घोरपडे यांच्या तक्रारीवरून फलटण ग्रामीण पोलीस स्टेशनमध्ये गुन्हा दाखल करण्यात आला असून संशयित महिलेला अटक करण्यात आली आहे.
नेमके काय घडले?
सांगवी येथे सकाळी साडेसात वाजता दुर्गा दौडनिमित्त ग्रामप्रदक्षिणा सुरू होती. एका घराजवळ हा कार्यक्रम सुरू असताना एका संशयित महिलेने लोखंडी रॉड घेऊन दौडमध्ये प्रवेश केला आणि आक्षेपार्ह वक्तव्य करत उपस्थितांना मारहाण करण्यास सुरुवात केली. या हल्ल्यात एका अकरा वर्षीय अल्पवयीन मुलीसह तिला वाचवण्यासाठी गेलेले इतर काही नागरिक जखमी झाले आहेत. जखमींवर तातडीने रुग्णालयात उपचार करण्यात आले. या घटनेमुळे परिसरात काही काळ तणावाचे वातावरण निर्माण झाले होते.
अफवांवर विश्वास न ठेवण्याचे पोलिसांचे आवाहन
या घटनेची माहिती मिळताच फलटण ग्रामीण पोलीस स्टेशनच्या अधिकाऱ्यांनी त्वरित कारवाई करत संशयित महिलेला अटक केली असून पुढील तपास सुरू आहे. सोशल मीडिया किंवा इतर माध्यमातून पसरत असलेल्या कोणत्याही अफवांवर नागरिकांनी विश्वास ठेवू नये. परिसरातील कायदा व सुव्यवस्था अबाधित असून, नागरिकांनी कोणतीही अफवा न पसरवता पोलीस तपासास सहकार्य करावे, असे आवाहन प्रभारी पोलीस अधिकाऱ्यांनी केले आहे.
