रणजितदादांच्या रूपाने सद्गुरू परिवारातील एक सभासद जिल्हा बँकेचा संचालक झाल्याचा सार्थ अभिमान : दिलीपसिंह भोसले
थेट WhatsApp वर मिळवा
रणजितसिंह नाईक निंबाळकर यांची सातारा जिल्हा मध्यवर्ती बँकेवर बिनविरोध निवड झाल्याबद्दल फलटण येथे आयोजित सत्कार समारंभात दिलीपसिंह भोसले यांनी सहकार चळवळीला बळ देण्याचे आवाहन केले आहे.
स्थैर्य, फलटण, दि. ०४ नोव्हेंबर : सातारा जिल्हा मध्यवर्ती सहकारी बँकेच्या संचालकपदी ‘नागरी बँका व पतसंस्था’ मतदारसंघातून रणजितसिंह नाईक निंबाळकर यांची नुकतीच बिनविरोध निवड झाली आहे. या यशानिमित्त सद्गुरू आणि महाराजा उद्योग समूहाचे शिल्पकार दिलीपसिंह भोसले यांनी त्यांचा विशेष सत्कार केला. सद्गुरू पतसंस्थेचा एक सभासद जिल्हा बँकेचा संचालक झाल्याचा सार्थ अभिमान असल्याचे यावेळी ते म्हणाले.
सहकाराला बळ देण्याची गरज
सत्कार समारंभात बोलताना दिलीपसिंह भोसले यांनी रणजितसिंह नाईक निंबाळकर यांच्या सहकार क्षेत्रातील प्रवासाचे कौतुक केले. अनेक वर्षे खुल्या निवडणुका लढवल्यानंतर त्यांची सहकारातही यशस्वी वाटचाल सुरू झाली आहे. तालुक्यात लोप पावत चाललेला सहकार पुन्हा उभा करण्याची जबाबदारी आता त्यांच्यावर असून, पतसंस्था आणि सोसायट्यांचे जाळे नव्याने निर्माण करावे लागेल, अशी अपेक्षा त्यांनी व्यक्त केली.
नव्या ताकदीने काम करण्याचा संकल्प
या इलेक्शनमध्ये समशेरसिंह नाईक निंबाळकर यांनी अत्यंत अल्प मतांनी पराभव स्वीकारला असला तरी, त्यांनी प्रस्थापितांना कडवी झुंज दिल्याचे दिलीपसिंह भोसले यांनी आवर्जून सांगितले. थांबून न राहता पुन्हा दुप्पट ताकदीने कामाला लागून पुढील निवडणूक जिंकण्याचा विश्वास त्यांनी व्यक्त केला. तसेच, गेली अनेक वर्षे प्रस्थापितांनी थांबवलेली नवीन सोसायट्या आणि सभासदांची नोंदणी पुन्हा सुरू करण्यासाठी भाजपच्या माध्यमातून प्रयत्न करावे लागतील, असेही ते म्हणाले.
