माणसात जशी ‘माणुसकी’, तशीच झाडांमधली ‘झाडूसकी’ जपणे काळाची गरज: रानकवी राहुल निकम; पाडेगावमध्ये महापुरुषांना आगळीवेगळी आदरांजली

पाडेगाव सामाजिक विकास फाउंडेशन आयोजित महापुरुषांच्या संयुक्त जयंती कार्यक्रमात वनाधिकारी तथा रानकवी राहुल निकम यांनी निसर्ग संवर्धनाचा संदेश दिला. यावेळी त्यांना मानाच्या ‘साहित्य रत्न’ पुरस्काराने सन्मानित करण्यात आले.

स्थैर्य, पाडेगाव, दि. 17 एप्रिल : “माणूस हा निसर्गाशी घट्ट जोडलेला आहे. आपण निसर्गाला देव मानतो, त्यातील प्रत्येक प्राणी, वनस्पती यांची पूजा करतो. जशी माणसात ‘माणुसकी’ असणे आवश्यक आहे, अगदी तशीच झाडांमधली ‘झाडूसकी’ जपणेही तितकेच महत्त्वाचे आहे. हिरवा श्वास देणाऱ्या निसर्गाची आणि झाडांची काळजी घेणे ही आता प्रत्येकाची जबाबदारी आहे,” असे अत्यंत प्रभावी आणि मार्मिक प्रतिपादन वाई परिक्षेत्राचे नियतक्षेत्र वनाधिकारी तथा प्रसिद्ध रानकवी राहुल निकम यांनी केले.

पाडेगाव सामाजिक विकास फाउंडेशनच्या वतीने आयोजित ‘महापुरुषांच्या जयंती’ संयुक्त कार्यक्रमात ते बोलत होते. यावेळी सर्व महापुरुषांना एकाच मंचावर अभिवादन करत वैचारिक प्रबोधनाचा जागर करण्यात आला.

रानकवी राहुल निकम यांना ‘साहित्य रत्न’ पुरस्कार:

याप्रसंगी रानकवी राहुल निकम यांच्या साहित्य क्षेत्रातील आणि निसर्ग संवर्धनातील योगदानाची विशेष दखल घेत, त्यांना फाउंडेशनच्या वतीने मानाच्या ‘साहित्य रत्न’ पुरस्काराने सन्मानित करण्यात आले. या सत्कारानंतर त्यांनी केलेल्या बहारदार आणि प्रबोधनात्मक काव्य सादरीकरणाने उपस्थितांची मने जिंकली व कार्यक्रमात वेगळीच रंगत आणली.

सर्व महापुरुषांना एकाच मंचावर अभिवादन ही प्रेरणादायी बाब:

कार्यक्रमात प्रमुख पाहुणे म्हणून उपस्थित असलेले प्रा. विकास शिंदे यांनी आपल्या भाषणात फाउंडेशनच्या अनोख्या उपक्रमाचे विशेष कौतुक केले. ते म्हणाले, “पाडेगाव सामाजिक विकास फाउंडेशनचा हा मंच खऱ्या अर्थाने समाज प्रबोधन करणारा मंच आहे. येथे सर्व महापुरुषांच्या जयंती वेगवेगळ्या न साजरी करता एकाच व्यासपीठावर साजऱ्या केल्या जातात, ही बाब अत्यंत प्रेरणादायी आणि समाजाला दिशा देणारी आहे. या मंचावरून समता, शिक्षण आणि संविधानाच्या मूल्यांची जी शिकवण दिली जाते, ती प्रबोधनाची चळवळ संपूर्ण महाराष्ट्रभर पोहोचायला हवी.”

वैचारिक पेरणी करणारा उपक्रम:

या प्रबोधनात्मक कार्यक्रमाचे प्रास्ताविक जिल्हा परिषद सदस्य गिरीश बनकर यांनी केले. त्यांनी फाउंडेशनच्या विविध सामाजिक उपक्रमांची माहिती देत भविष्यातील प्रबोधनाच्या कार्याची दिशा स्पष्ट केली.

या कार्यक्रमास पाडेगाव आणि परिसरातील शेकडो महिला, युवक आणि ग्रामस्थ मोठ्या संख्येने उपस्थित होते. पाडेगाव सामाजिक विकास फाउंडेशनचा हा उपक्रम केवळ जयंती साजरी करण्यापुरता मर्यादित न राहता, समाजमनात सामाजिक ऐक्य, पर्यावरण जागरूकता आणि महापुरुषांच्या खऱ्या विचारांची पेरणी करणारा ठरल्याची भावना यावेळी व्यक्त करण्यात आली.