सणासुदीत डाळींना महागाईचा तडका; चणा, तूर आणि मूग डाळींचे भाव कडाडले
थेट WhatsApp वर मिळवा
सणासुदीच्या काळात मागणी वाढल्याने आणि बाजारातील आवक घटल्याने घाऊक व किरकोळ बाजारात चणा, तूर आणि मूग डाळींचे दर वधारले आहेत.
स्थैर्य, सातारा, दि. ११ ऑक्टोबर : दसरा आणि दिवाळीच्या तोंडावर सर्वसामान्य नागरिकांच्या स्वयंपाकघराचे बजेट कोलमडण्याची शक्यता निर्माण झाली आहे. राज्यातील कमी पर्जन्यमान आणि वाशी येथील कृषी उत्पन्न बाजार समितीमध्ये (APMC) डाळींची आवक घटल्यामुळे चणा, तूर आणि मूग डाळींच्या दरात मोठी वाढ झाली आहे. घाऊक बाजारात डाळींच्या किमती १० ते २० रुपयांनी वाढल्या असून, त्याचा थेट परिणाम किरकोळ बाजारावर दिसून येत आहे. किरकोळ बाजारात डाळींचे भाव २० ते ३० रुपयांपर्यंत कडाडले आहेत.
घाऊक आणि किरकोळ बाजारातील दर
वाशी बाजार समितीत आधी ७२ रुपये किलो असलेली चणा डाळ आता ८२ रुपयांवर पोहोचली आहे. तर ९० रुपये किलोची तूर डाळ १०५ रुपयांवर आणि ९५ रुपये किलोची मूग डाळ १०५ रुपये प्रति किलो झाली आहे. घाऊक बाजारातील या वाढीमुळे किरकोळ बाजारात चणा डाळ १३० रुपये, तूर डाळ १५० रुपये आणि मूग डाळ १४० रुपये प्रति किलो दराने विकली जात आहे. सणासुदीच्या काळात डाळींपासून बनवल्या जाणाऱ्या पदार्थांची मागणी वाढल्याने ही भाववाढ अधिक जाणवत आहे.
आवक घसरल्याने दरावर परिणाम
राज्यातील काही भागात निर्माण झालेली पाण्याची टंचाई आणि प्रतिकूल हवामानामुळे पिकांवर परिणाम झाला आहे. परिणामी, बाजारात धान्याची आणि कडधान्याची आवक मंदावली आहे. पुरवठा कमी आणि मागणी जास्त अशी परिस्थिती निर्माण झाल्याने आगामी दिवसांत डाळींचे दर चढेच राहण्याची शक्यता व्यापाऱ्यांनी व्यक्त केली आहे.
