दुष्काळावर बळीराजाची मात; उसाची ‘पाचट कुट्टी’ ठरतेय संजीवनी
थेट WhatsApp वर मिळवा
फलटण तालुक्यात यावर्षी पावसाने पाठ दिल्याने ओढवलेल्या भीषण दुष्काळी परिस्थितीत जमिनीचा ओलावा आणि सुपीकता टिकवून ठेवण्यासाठी राजाळे येथील शेतकरी सुजित निंबाळकर यांनी ऊस तोडणीनंतर ‘पाचट कुट्टी’ करण्याचा महत्त्वपूर्ण पर्याय पुढे आणला आहे.
स्थैर्य, राजाळे, दि. १२ नोव्हेंबर : यावर्षी पावसाने पाठ केल्यामुळे फलटण तालुक्यासह संपूर्ण परिसरात दुष्काळी परिस्थिती निर्माण झाली असून, पिण्याच्या पाण्यासोबतच शेतीच्या सिंचनाचा मोठा प्रश्न उभा ठाकला आहे. अशा हलाखीच्या परिस्थितीत पारंपारिक शेती पद्धती बदलून पाण्याचा प्रत्येक थेंब आणि जमिनीचा ओलावा टिकवून ठेवण्यासाठी शेतकऱ्यांना आधुनिक व शाश्वत उपायांकडे वळावे लागत आहे. ऊस तोडणीनंतर शेतात मागे उरणारे पाचट जाळून नष्ट करण्याऐवजी ‘पाचट कुट्टी’ करणे हा आजच्या दुष्काळी स्थितीत जमिनीचा जीव वाचवणारा सर्वात प्रभावी पर्याय ठरत आहे.
जमिनीतील ओलावा आणि धूप थांबवणे
उन्हाळ्यात आणि दुष्काळात जमिनीतील ओलावा झपाट्याने उडून जातो. पाचट कुट्टीचे आच्छादन केल्यामुळे जमिनीची धूप थांबते आणि पाण्याचे बाष्पीभवन कमी होऊन ओलावा दीर्घकाळ टिकून राहण्यास मदत होते.
सेंद्रिय कर्बन आणि तण नियंत्रण
पाचट कुट्टी कुजल्यानंतर त्याचे उत्तम सेंद्रिय खतात रूपांतर होते, ज्यामुळे जमिनीची सुपीकता आणि पोत सुधारतो. तसेच शेतात पाचटाचे आच्छादन असल्यामुळे तणांची वाढ होत नाही, परिणामी खुरपणीचा खर्च आणि मजुरी वाचते. याशिवाय पाचट जाळल्यामुळे होणारे हवेचे प्रदूषण टाळता येते.
