फलटण: स्टेटस वादाचे तीव्र पडसाद; आजिम अत्तारवर गुन्हा दाखल करण्याची मागणी, बेकायदा घर पाडण्यासाठी सोमवारी नगरपालिकेवर धडकणार
छत्रपती संभाजी महाराज जयंतीच्या स्टेटसवरून अनिकेत घाडगेला धमकावल्याप्रकरणी सकल हिंदू समाजाने पोलीस ठाण्यावर धडक दिली. आजिम अत्तारवर कठोर कारवाई आणि त्याचे अतिक्रमणातील घर पाडण्याची मागणी करण्यात आली आहे.
स्थैर्य, फलटण, दि. १६ मे : छत्रपती संभाजी महाराज यांच्या जयंतीनिमित्त इन्स्टाग्रामवर ठेवलेल्या रिल्सवरून अनिकेत घाडगे या तरुणाला फोनवरून शिवीगाळ करत घरी जाऊन धमकावल्याचा प्रकार नुकताच घडला होता. या घटनेचा आणि अशा प्रवृत्तीचा तीव्र निषेध नोंदवण्यासाठी काल सायंकाळी फलटण शहरातील सकल हिंदू समाजाच्या वतीने धर्मवीर छत्रपती संभाजी महाराज यांच्या स्मारकाजवळ मोठी गर्दी झाली होती. तिथे जाहीर निषेध नोंदवल्यानंतर, जमलेल्या सर्व नागरिकांनी थेट फलटण शहर पोलीस ठाण्यावर धडक दिली.
केवळ ‘एन.सी.’ का? पोलिसांना संतप्त सवाल:
पोलीस ठाण्यात पोहोचल्यानंतर जमावाने पोलिसांच्या कार्यपद्धतीवर प्रश्नचिन्ह निर्माण केले. अनिकेत घाडगे हा जेव्हा तक्रार दाखल करण्यासाठी पोलीस ठाण्यात आला होता, तेव्हा पोलिसांनी रीतसर एफआयआर (FIR) दाखल करण्याऐवजी केवळ अदखलपात्र (NCR) गुन्ह्याची नोंद का केली? असा संतप्त सवाल यावेळी सकल हिंदू समाजाच्या वतीने उपस्थित करण्यात आला.
आजिम अत्तारला ताब्यात घेऊन साताऱ्याला पाठवले:
नागरिकांचा रोष पाहता, पोलिसांनी जमावाला शांत करत योग्य त्या कारवाईचे आश्वासन दिले. तसेच, या प्रकरणात रीतसर गुन्हा दाखल करून घेण्याची प्रक्रिया सुरू असल्याचे पोलिसांकडून सांगण्यात आले. संबंधित आरोपी आजिम अत्तार याला पोलिसांनी ताब्यात घेतले असून, त्याला पुढील कारवाईसाठी सातारा येथे पाठवण्यात आले असल्याची माहिती पोलिसांनी आंदोलकांना दिली.
अतिक्रमणातील घर जमीनदोस्त करण्याची मागणी; सोमवारी नगरपालिकेत जाणार:
या प्रकरणातील आरोपी आजिम अत्तार याचे राहते घर हे अतिक्रमणात आणि बेकायदेशीररीत्या बांधलेले असल्याचा दावा सकल हिंदू समाजाकडून करण्यात आला आहे. हे बेकायदेशीर बांधकाम तत्काळ जमीनदोस्त करण्यात यावे, अशी आक्रमक मागणी यावेळी करण्यात आली. याच मागणीसाठी उद्या, सोमवार (दि. १८ मे) रोजी सकल हिंदू समाज फलटण शहरच्या वतीने फलटण नगरपालिकेत जाऊन अधिकाऱ्यांना जाब विचारला जाणार आहे.
या सर्व प्रकारामुळे शहरात काही काळ तणावाचे वातावरण निर्माण झाले होते; मात्र पोलिसांच्या आश्वासनानंतर सध्यातरी जमाव शांत झाला असून, सोमवारी नगरपालिकेत होणाऱ्या आंदोलनाकडे सर्वांचे लक्ष लागून राहिले आहे.
