फलटण शहर व उपनगरांमध्ये मान्सूनपूर्व पावसाची हजेरी; उकाड्यापासून नागरिकांना मोठा दिलासा

स्थैर्य, फलटण, दि. ३ जून : फलटण शहरासह शहराची उपनगरे असलेल्या कोळकी, जाधववाडी, फरांदवाडी यांसह तालुक्यातील विविध भागांत मान्सूनपूर्व पावसाने हजेरी लावली आहे. या पावसामुळे गेल्या अनेक दिवसांपासून जाणवणाऱ्या प्रचंड उकाड्यातून नागरिकांना काहीसा दिलासा मिळाला आहे.

वातावरणात सुखद गारवा

गेल्या काही दिवसांपासून फलटण शहर व तालुक्यात तापमानाचा पारा लक्षणीय वाढला होता, ज्यामुळे नागरिक प्रचंड उकाड्याने हैराण झाले होते. मात्र, मान्सूनपूर्व पावसामुळे वातावरणात सुखद गारवा निर्माण झाला आहे. कोळकी, जाधववाडी आणि फरांदवाडीसारख्या उपनगरांमध्येही पावसाच्या सरी कोसळल्याने वातावरणात बदल जाणवत आहे.

मान्सूनच्या आगमनाची प्रतीक्षा

मान्सूनपूर्व पावसाने हजेरी लावून उकाड्यापासून तात्पुरती सुटका केली असली तरी, आता सर्वच नागरिक आणि शेतकरी वर्ग मान्सूनच्या आगमनाकडे डोळे लावून बसले आहेत. खरीप हंगामातील पेरण्या आणि शेतीची पुढील कामे या मान्सूनवरच अवलंबून असल्याने बळीराजाला आता दमदार पावसाची प्रतीक्षा आहे.