खाद्यतेल पुन्हा महागणार; सोयाबीन उत्पादन घटण्याची भीती, गृहिणींचे बजेट कोलमडणार
थेट WhatsApp वर मिळवा
राज्यातील सोयाबीन पट्ट्यातील दुष्काळी परिस्थिती आणि आंतरराष्ट्रीय बाजारातील घडामोडींमुळे महाराष्ट्रात खाद्यतेलाचे दर पुन्हा वाढण्याची शक्यता निर्माण झाली आहे.
स्थैर्य, सातारा, दि. २७ ऑक्टोबर : दिवाळीच्या तोंडावर महाराष्ट्रातील सर्वसामान्य नागरिकांना महागाईचा आणखी एक फटका बसण्याची शक्यता आहे. डाळी, तांदूळ आणि भाजीपाल्यापाठोपाठ आता खाद्यतेलाच्या किमतीही पुन्हा वाढण्याचे संकेत मिळत आहेत. राज्यातील प्रमुख सोयाबीन उत्पादक भागांमध्ये पावसाची कमतरता आणि दुष्काळसदृश परिस्थिती निर्माण झाल्याने तेलबियांच्या उत्पादनावर विपरीत परिणाम होण्याची शक्यता वर्तवली जात आहे. त्यातच आंतरराष्ट्रीय बाजारपेठेतील पुरवठ्यावरील दबावामुळे आगामी काळात सोयाबीन, सूर्यफूल, पाम आणि शेंगदाणा तेलाच्या किमती वाढल्यास त्याचा थेट परिणाम सर्वसामान्यांच्या बजेटवर होणार आहे.
सोयाबीन उत्पादनात घट होण्याची शक्यता
महाराष्ट्र हा देशातील प्रमुख सोयाबीन उत्पादक राज्यांपैकी एक असून लातूर, जालना आणि अकोला यांसारख्या जिल्ह्यांमध्ये याचे मोठ्या प्रमाणावर उत्पादन घेतले जाते. मात्र, यंदा पावसाची तूट आणि प्रतिकूल हवामानामुळे उत्पादन घटण्याची भीती व्यक्त केली जात आहे. देशातील खाद्यतेल उत्पादनात २०२५-२६ मधील ९७ लाख टनांच्या तुलनेत २०२६-२७ मध्ये ९२ लाख टनांचा अंदाज आहे. उत्पादनातील या ५ ते १० टक्क्यांच्या घटिमुळे स्थानिक तेलनिर्मिती आणि बाजारातील उपलब्धतेवर ताण येऊ शकतो.
आंतरराष्ट्रीय बाजाराचा आणि बायोडिझेल धोरणाचा परिणाम
दुसऱ्या बाजूला आंतरराष्ट्रीय बाजारपेठेतील घडामोडींचाही भारतीय बाजारावर परिणाम होत आहे. इंडोनेशियामध्ये एल निनो आणि दुष्काळामुळे पाम तेलाचे उत्पादन सुमारे ५० लाख टनांनी घटण्याची शक्यता आहे. तसेच इंडोनेशियाच्या बी-५० बायोडिझेल धोरणामुळे पाम तेलाचा मोठा साठा देशांतर्गत वापरासाठी वळवला जाणार आहे. भारत आपल्या गरजेचा मोठा भाग आयातीद्वारे पूर्ण करत असल्याने जागतिक बाजारातील या तुटवड्याचा थेट परिणाम देशांतर्गत किमतींवर होण्याची दाट शक्यता आहे.
दिवाळीच्या फराळाचा खर्च वाढणार
सध्या पुणे आणि मुंबईच्या किरकोळ बाजारात सूर्यफूल तेल १९० ते १९५ रुपये, पाम तेल १५० ते १५५ रुपये, सोयाबीन तेल १६५ ते १७० रुपये, तर शेंगदाणा तेल १८५ ते २०० रुपये प्रतिकिलो दराने उपलब्ध आहे. सांगलीच्या बाजारपेठेतही गेल्या दहा दिवसांत खाद्यतेलाच्या डब्यामागे सुमारे १०० रुपयांची वाढ झाली आहे. दिवाळीच्या सणात फराळाचे पदार्थ तयार करण्यासाठी मोठ्या प्रमाणात तेल लागत असल्याने, व्यापाऱ्यांनी वर्तवलेल्या दरवाढीच्या शक्यतेमुळे गृहिणींचे आर्थिक नियोजन बिघडण्याची चिन्हे आहेत.
