फलटण: नगराध्यक्ष समशेरसिंह यांच्याकडून शहरातील विकासकामांची अचानक पाहणी; वारकऱ्यांची काळजी घेण्याचे निर्देश
फलटण नगरपरिषदेचे नगराध्यक्ष समशेरसिंह नाईक निंबाळकर यांनी शहरातील ब्राह्मण गल्ली व गजानन चौक येथील विकासकामांची आणि अंतर्गत पालखी मार्गाची अचानक पाहणी केली.
स्थैर्य, फलटण, दि. १६ मे : फलटण नगरपरिषदेचे नगराध्यक्ष समशेरसिंह नाईक निंबाळकर यांनी काल सायंकाळी शहरात सुरू असलेल्या विविध विकासकामांची अचानक पाहणी केली. यावेळी त्यांनी कामाच्या दर्जाची तपासणी करत नागरिकांशी संवाद साधला व संबंधित अधिकारी आणि ठेकेदारांना आवश्यक त्या सूचना दिल्या.
ब्राह्मण गल्लीत पाईपलाईन कामाची पाहणी:
शहरात सध्या पाणीपुरवठा आणि रस्त्यांची कामे वेगाने सुरू आहेत. याचाच एक भाग म्हणून ब्राह्मण गल्ली येथे नव्याने पिण्याच्या पाण्याची पाईपलाईन टाकण्याचे काम सध्या सुरू आहे. नगराध्यक्ष समशेरसिंह नाईक निंबाळकर यांनी या ठिकाणी भेट देऊन प्रत्यक्ष कामाची पाहणी केली. यावेळी त्यांनी स्थानिक रहिवासी नागरिकांशी मोकळा संवाद साधला आणि त्यांच्या समस्या व सूचना जाणून घेतल्या. तसेच, सुरू असलेल्या पाईपलाईन कामाचा दर्जा योग्य राखला जात आहे की नाही, याचीही त्यांनी बारकाईने पाहणी केली.
पालखी सोहळ्याच्या पार्श्वभूमीवर गजानन चौकात पाहणी:
श्री संत ज्ञानेश्वर महाराज यांचा आषाढी वारी पालखी सोहळा अगदी काही दिवसांवर येऊन ठेपला आहे. या पार्श्वभूमीवर फलटण शहरात सुरू असलेल्या अंतर्गत पालखी मार्गाच्या कामाला वेग आला आहे. या अंतर्गत मार्गाची गजानन चौक येथे जाऊन नगराध्यक्षांनी पाहणी केली. पालखी सोहळ्यात सहभागी होणाऱ्या वारकऱ्यांना रस्त्यांच्या कामांमुळे कोणताही त्रास होणार नाही आणि त्यांचे मार्गक्रमण सुरक्षित व सुखकर होईल, याची काळजी घेण्याचे सक्त निर्देश यावेळी नगराध्यक्ष समशेरसिंह नाईक निंबाळकर यांनी नगरपरिषदेचे अधिकारी व ठेकेदारांना दिले आहेत.
या अचानक केलेल्या पाहणी दौऱ्यावेळी नगरसेवक संदीप चोरमले, माजी नगरसेवक अनुप शहा, भरत बेडके, अजिंक्य बेडके यांच्यासह फलटण नगरपरिषदेचे संबंधित अधिकारी आणि काम करणारे ठेकेदार उपस्थित होते.
