फलटण: कृषी अधिकाऱ्यांनी शेतकऱ्यांना तत्काळ मदत करावी; टाळाटाळ खपवून घेणार नाही – आमदार सचिन पाटील

फलटण पंचायत समितीत खरीप हंगामपूर्व नियोजन आढावा बैठक पार पडली. अल निनोच्या पार्श्वभूमीवर पाणी नियोजन, खतांचा पुरवठा व आधुनिक तंत्रज्ञानावर भर देण्याचे निर्देश आमदार सचिन पाटील यांनी दिले.

स्थैर्य, फलटण, दि. 12 मे : पंचायत समिती फलटण येथील सभागृहात आमदार सचिन पाटील यांच्या अध्यक्षतेखाली व पंचायत समितीच्या सभापती शिवांजली भोसले यांच्या प्रमुख उपस्थितीत तालुकास्तरीय ‘खरीप हंगामपूर्व नियोजन आढावा बैठक’ नुकतीच पार पडली. कृषी क्रांतीचे प्रणेते स्व. वसंतराव नाईक यांच्या प्रतिमेस पुष्पहार अर्पण करून या बैठकीची सुरुवात झाली.

या बैठकीत प्रामुख्याने खरीप हंगामातील पीक नियोजन, पीक विमा, पाणी नियोजन, खतांचा पुरवठा, महाडीबीटी अंतर्गत शेतकऱ्यांच्या योजना आणि ‘अल निनो’च्या संभाव्य प्रभावावर सविस्तर चर्चा करण्यात आली.

आमदार सचिन पाटील यांनी दिलेल्या महत्त्वाच्या सूचना व निर्देश:

• पाणी व पीक नियोजन: यावर्षी ‘अल निनो’च्या प्रभावामुळे पाऊसमान कमी राहण्याची शक्यता आहे. त्यामुळे पाण्याचे सुयोग्य व्यवस्थापन करावे आणि कमी पाण्यात व अल्प कालावधीत येणाऱ्या पिकांच्या बियाणांचे वाण तालुक्यातील सर्व कृषी केंद्रांवर उपलब्ध करून द्यावेत.

  

• खतांचा काळाबाजार व भेसळ: सध्या युरियामध्ये भेसळ व लिंकिंगचे प्रकार समोर येत आहेत. कृषी विभागाच्या भरारी पथकांनी याची योग्य तपासणी करून निष्पक्ष व कठोर कारवाई करावी.

• शेतकऱ्यांना तत्काळ मदत: शेतकरी हा जगाचा पोशिंदा आहे. क्षेत्रीय कृषी अधिकाऱ्यांनी शेतकऱ्यांना आवश्यक असेल तेव्हा तत्काळ मार्गदर्शन व मदत करावी. कृषी विभागाकडून शेतकऱ्यांच्या कामात विलंब अथवा टाळाटाळ झाल्यास खपवून घेतले जाणार नाही, असा सक्त इशारा त्यांनी दिला.

• नैसर्गिक आपत्ती व पंचनामे: नैसर्गिक आपत्तीच्या काळात शेतकऱ्यांचे अतोनात नुकसान होते. अशा वेळी तलाठी आणि कृषी अधिकाऱ्यांनी तातडीने नुकसानीचे पंचनामे करावेत, जेणेकरून शेतकऱ्यांना लवकर नुकसान भरपाई मिळेल.

• आधुनिक तंत्रज्ञानाचा वापर: तालुक्यातील सासकल, गिरवी, धुमाळवाडी, निरगुडी व बोडकेवाडी या पाच गावांमध्ये AI (कृत्रिम बुद्धिमत्ता) तंत्रज्ञान विकसित करण्यात आले असून त्याचे प्रशिक्षण सुरू आहे. इतर गावांमध्येही या तंत्रज्ञानाचा आणि फवारणीसाठी ‘ड्रोन’चा वापर वाढवण्यासाठी कृषी अधिकाऱ्यांनी पुढाकार घ्यावा.

• योजनांची प्रभावी अंमलबजावणी: गोपीनाथ मुंडे शेतकरी अपघात सानुग्रह अनुदान योजना तालुक्यात प्रभावीपणे राबवावी, जेणेकरून अपघातात मृत्यूमुखी पडलेल्या शेतकरी कुटुंबाला तत्काळ आर्थिक मदत मिळेल.

संपूर्ण फलटण तालुका लवकरच ओलिताखाली:

माजी खासदार रणजितसिंह नाईक निंबाळकर यांच्या अथक प्रयत्नांमुळे नीरा देवघर आणि बारमाही धोम-बलकवडी कालव्याचे पाणी लवकरच फलटण तालुक्यात पोहोचणार आहे. येत्या वर्षभरात संपूर्ण फलटण तालुका ओलिताखाली येणार असल्याने, भविष्यात कृषी विभागाने संपूर्ण कार्यक्षमतेने आणि सकारात्मक दृष्टिकोनातून काम करावे, अशी अपेक्षा आमदार पाटील यांनी व्यक्त केली.

यावेळी खरीप हंगाम २०२६-२७ च्या आपत्कालीन पीक नियोजन आराखड्याचे सादरीकरण करण्यात आले. या बैठकीस पंचायत समितीच्या सभापती शिवांजली भोसले, गटविकास अधिकारी प्रकाश बोंबले, उपविभागीय कृषी अधिकारी मोमीन, पाडेगाव मध्यवर्ती ऊस संशोधन केंद्राचे सहायक राजेंद्र पांढरे, तालुका कृषी अधिकारी दत्तात्रय गायकवाड यांच्यासह सर्व मंडल कृषी अधिकारी, उपकृषी अधिकारी व कृषी सहायक मोठ्या संख्येने उपस्थित होते.