फलटण: महिलांसाठी आळिंबी उत्पादन प्रशिक्षण – स्वावलंबनाकडे टाकले नवे पाऊल
महिला सक्षमीकरण आणि ग्रामीण भागातील महिलांना रोजगाराच्या नव्या संधी उपलब्ध करून देण्यासाठी फलटणमध्ये आळिंबी (मशरूम) उत्पादन विषयक प्रशिक्षण कार्यक्रम उत्साहात पार पडला.
स्थैर्य, फलटण, दि. 26 मे : महिला आर्थिक विकास महामंडळ (सातारा) अंतर्गत ओम साई लोकसंचालित साधन केंद्र (फलटण), श्रीमंत शिवाजीराजे उद्यानविद्या महाविद्यालय आणि कृषी महाविद्यालय (फलटण) यांच्या संयुक्त विद्यमाने महिलांसाठी आळिंबी उत्पादन प्रशिक्षण कार्यक्रमाचे आयोजन करण्यात आले होते. या कार्यक्रमात फलटण पंचक्रोशीतील विविध महिला बचत गटांमधील सदस्यांनी उत्स्फूर्त सहभाग नोंदवला.
प्रात्यक्षिकांसह तज्ज्ञांचे सविस्तर मार्गदर्शन
या कार्यक्रमात कृषी महाविद्यालयातील पीक विकृती शास्त्र विभागाचे सहाय्यक प्राध्यापक प्रा. पी. व्ही. भोसले यांनी मुख्य मार्गदर्शक म्हणून महिलांना आळिंबी उत्पादनाची संपूर्ण माहिती दिली. त्यांनी आळिंबी लागवडीसाठी आवश्यक असलेले वातावरण, बियाण्यांची निवड, उत्पादन पद्धती, लागणारे साहित्य, स्वच्छता आणि रोग व कीड व्यवस्थापन याबाबत मार्गदर्शन केले.
कमी जागा आणि कमी भांडवलात घरच्या घरी आळिंबी उत्पादन करून महिलांनी स्वावलंबनाकडे वाटचाल करावी, असे आवाहन प्रा. भोसले यांनी केले. यावेळी महिलांना आळिंबी उत्पादनाचे प्रत्यक्ष प्रात्यक्षिकही दाखवण्यात आले, ज्यामुळे व्यवसायातून आर्थिक उत्पन्न कसे वाढवता येईल याची माहिती त्यांना मिळाली.
स्वयंरोजगारातून आर्थिक सक्षमीकरणाचा विश्वास
श्रीमंत शिवाजीराजे उद्यानविद्या महाविद्यालयाचे प्राचार्य डॉ. एस. डी. निंबाळकर आणि कृषी महाविद्यालयाचे प्राचार्य डॉ. यू. डी. चव्हाण यांनी याप्रसंगी आपले विचार मांडले. अशा प्रशिक्षण कार्यक्रमांमुळे ग्रामीण महिलांच्या आर्थिक विकासाला नक्कीच चालना मिळेल, असा विश्वास त्यांनी व्यक्त केला. तसेच, महिला बचत गटांनी महाविद्यालयातील इतर कृषीपूरक उपक्रमांची माहिती घेऊन त्याचा जास्तीत जास्त लाभ घेण्याचे आवाहन त्यांनी केले.
यावेळी बचत गट समन्वयक सुशांत चोरमले आणि बचत गट व्यवस्थापक काटकर यांची प्रमुख उपस्थिती लाभली. त्यांनीही महिलांना विविध स्वयंरोजगाराच्या संधींचा लाभ घेऊन आर्थिकदृष्ट्या सक्षम होण्याचे आवाहन केले.
या यशस्वी आयोजनासाठी महिला बचत गट आयोजक संस्था तसेच महाविद्यालयातील प्राध्यापक व कर्मचाऱ्यांनी विशेष परिश्रम घेतले. प्रशिक्षण पूर्ण झाल्यानंतर उपस्थित महिलांनी समाधान व्यक्त करत, असे उपयुक्त प्रशिक्षण कार्यक्रम भविष्यातही सातत्याने आयोजित करावेत, अशी अपेक्षा व्यक्त केली.
