मुलांचा खोकला दोन आठवड्यांनंतरही थांबत नाही? दुर्लक्ष केल्यास उद्भवू शकतो गंभीर धोका

दैनिक स्थैर्य • WhatsApp Channel
सातारा जिल्ह्यातील ताज्या बातम्या
थेट WhatsApp वर मिळवा
WhatsApp Channel JOIN करा ›

वायुप्रदूषण आणि बदलत्या हवामानामुळे लहान मुलांमध्ये सततचा खोकला वाढला असून, दोन आठवड्यांहून अधिक काळ खोकला राहिल्यास तातडीने डॉक्टरांचा सल्ला घ्यावा.

स्थैर्य, सातारा, दि. २० नोव्हेंबर : बदलते हवामान, वाढते वायुप्रदूषण आणि वातावरणातील धूळ यामुळे लहान मुलांमध्ये श्वसनविकाराच्या तक्रारी मोठ्या प्रमाणात वाढत आहेत. अनेकदा पालक या खोकल्याला साधा ऋतुमानाचा बदल मानून दुर्लक्ष करतात, मात्र दोन आठवड्यांपेक्षा अधिक काळ खोकला राहिल्यास तो गंभीर आजाराचा संकेत असू शकतो, असा इशारा बालरोगतज्ज्ञांनी दिला आहे.

वायुप्रदूषण आणि फुफ्फुसांवरील परिणाम

लहान मुलांची फुफ्फुसे पूर्णपणे विकसित झालेली नसतात आणि प्रौढांच्या तुलनेत त्यांचा श्वास घेण्याचा वेग अधिक असतो. त्यामुळे वाहनांचा धूर आणि बांधकामातील सूक्ष्म धूलिकण त्यांच्या शरीरात जास्त प्रमाणात जातात. परिणामी श्वसनमार्गाला सूज येऊन खोकला, छातीत घरघर होणे आणि श्वास घेण्यास त्रास होण्यासारख्या समस्या उद्भवतात. विशेषतः दमा किंवा ॲलर्जीचा त्रास असलेल्या मुलांमध्ये ही लक्षणे अधिक तीव्र होतात.

कोणत्या लक्षणांकडे दुर्लक्ष करू नये?

खोकल्यासोबत ताप येणे, वेगाने श्वास घेणे, छातीत दुखणे, दूध किंवा जेवण न जाणे आणि असामान्य थकवा जाणवत असल्यास न्यूमोनिया किंवा इतर संसर्गाची शक्यता असते. दोन आठवड्यांहून अधिक काळ खोकला कायम राहिल्यास क्षयरोगासंबंधी तपासणी करणे गरजेचे असते. मुलांनी जोरजोरात श्वास घेणे, श्वास घेताना छाती आत ओढली जाणे, ओठ निळसर पडणे किंवा गुंगी येणे अशी लक्षणे दिसल्यास तातडीने वैद्यकीय मदत घ्यावी.

पालकांनी कोणती काळजी घ्यावी?

वैद्यकीय सल्ल्याशिवाय मुलांना परस्पर खोकल्याची औषधे किंवा अँटिबायोटिक्स देणे टाळावे. हवेची गुणवत्ता खराब असताना मुलांना बाहेर खेळण्यासाठी पाठवू नये आणि त्यांना धुराच्या संपर्कापासून दूर ठेवावे. तसेच मुलांचे वयानुसार लसीकरण वेळेत पूर्ण करावे, हातांची स्वच्छता राखावी आणि त्यांना पुरेसे पाणी पिण्याची सवय लावावी, असा सल्ला डॉक्टरांनी दिला आहे.

 

 

हे देखील वाचा

Back to top button
कॉपी करू नका..!