परहर बुद्रुकमध्ये नवा डीपी; श्रेय घेण्यावरून सरपंच रोहिदास उम्राटकर यांचा इशारा
परहर बुद्रुकमध्ये चोरीला गेलेल्या डीपीच्या जागी महावितरणने नवा डीपी बसवला आहे. या कामाचे श्रेय इतरांनी घेऊ नये, अशी भूमिका सरपंच रोहिदास उम्राटकर यांनी मांडली.
स्थैर्य, फलटण, दि. 25 ऑगस्ट : हिंगणगाव जिल्हा परिषद गटातील परहर बुद्रुक येथे काही महिन्यांपूर्वी महावितरणचा डीपी चोरीला गेला होता. त्यानंतर नवा डीपी बसवण्यासाठी माजी खासदार रणजितसिंह नाईक निंबाळकर यांच्या माध्यमातून आमदार सचिन पाटील यांच्याकडे पाठपुरावा करण्यात आला आणि त्यांच्या आदेशानुसार महावितरणने नवा डीपी बसवला, असा दावा परहर बुद्रुकचे सरपंच रोहिदास उम्राटकर यांनी केला आहे.
सोशल मीडियावरील श्रेयावरून नाराजी
परहर बुद्रुकमध्ये नव्याने बसवण्यात आलेल्या डीपीच्या कामाचे श्रेय काही जण सोशल मीडियावर घेत असल्याचा दावा उम्राटकर यांनी केला. या कामासाठी माजी खासदार रणजितसिंह नाईक निंबाळकर यांच्या माध्यमातून आमदार सचिन पाटील यांच्याकडे पाठपुरावा करण्यात आला होता. त्यानंतर महावितरणने तातडीने नवा डीपी बसवल्याचे त्यांनी सांगितले.
‘कामाचे श्रेय इतरांनी घेऊ नये’
आमदार सचिन पाटील यांच्या आदेशानंतर महावितरणने डीपी बसवला असून या कामाचे श्रेय इतरांनी घेऊ नये, असे उम्राटकर यांनी म्हटले आहे. आमच्या माध्यमातून झालेल्या कामांचे श्रेय घेऊन प्रसिद्धीत राहण्याचा प्रयत्न कुणीही करू नये, असा इशाराही त्यांनी दिला.
